Java e 35-të e Superiores ka pasur vlera të shumëfishta për të kuqtë e kryeqytetit, ku përveç kurorëzimit si kampion dhe marrjes së medaljeve, disa lojtarë janë vëzhguar nga emisarë të huaj. Njëri nga ata ka qenë Lorenc Trashi, për të cilin kishin udhëtuar nga Bullgaria për ta vëzhguar nga afër ndaj Kukësit.
Duke ditur se vinte nga një ngarkesë e lartë stërvitore në grumbullimin e Kombëtares, Trashi luajti vetëm 70 minuta. “Panorama Sport” ka zbuluar edhe klubin që është i interesuar për 27-vjeçarin, pikërisht bëhet fjalë për kampionët e Bullgarisë, Ludogorets.
Për ta ndjekur mbrojtësin e majtë të “demave” të dielën në stadiumin “Selman Stërmasi”, kanë qenë dy përfaqësues të kampionëve të Bullgarisë, drejtori sportiv dhe shefi i skautëve të klubit.
Gazeta ka mësuar se Ludogorets ka kohë që e monitoron Trashin dhe tani pritet ta bëjë ofertën konkrete në klubin e kuq për ta bërë të tijin mbrojtësin e “demave”. Referuar situatës aktuale, futbollisti i Partizanit shikohet shumë pranë kalimit te kampionët e Bullgarisë.
Ludogorets është superfuqi në futbollin bullgar, pasi titulli kampion ka qenë i tyre në tetë edicionet e fundit, pa ndërprerje. Përpos kësaj, bardhejeshilët kanë treguar progres edhe në Kupat e Europës, pasi në sezonet e fundit kanë qenë rregullisht në grupet e Champions-it dhe Ligës së Europës. Nëse palët bien dakord, padyshim Trashi hedh një hap të madh në karrierën e tij.
OFERTAT KROATE- Ditë më parë, “Panorama Sport” bëri me dije se për Lorenc Trashin ka interes edhe nga klube kroate, të cilat gjithashtu kanë dërguar në disa raste skautët e tyre për të ndjekur gramshiotin. Gazeta ka mësuar edhe emrat e klubeve kroate që janë të interesuara për mbrojtësin e Partizanit.
