Në rast se sulmuesi argjentinas Mauro Icardi vendos të largohet nga Interi, drejtuesit e klubit zikaltër kanë gati emrin e zëvendësuesit të tij. Ai është boshnjaku Edi Dzeko, një njohje e vjetër e trajnerit Roberto Mancini, që nga koha kur ishin së bashku te Manchester City. Prej kohësh është folur për një divorc me Icardi dhe Inter, sidomos tani që kanë ardhur pronarët e rinj kinezë, që duket se nuk preferojnë jetën e shfrenuar të sulmuesit argjentinas.
Por edhe ofertat në adresë të Icardi nuk mungojnë, ndaj në rast se paraqitet një ofërte e majme, drejtuesit e klubit zikaltër janë gati të negociojnë dhe shesin sulmuesin (kartoni i tij kushton 45 milionë euro). Dhe vendin e tij do ta zërë Edin Dzeko, që te Roma nuk dha atë që pritej dhe e sheh se nuk ka një vend titullari, gjë të cilën do t’ia garantonte Mancini tek Interi. Për më tepër që vlera e kartonit të sulmuesit boshnjak është 15 milionë euro, më e ulët se ajo e argjentinasit.
