Skënderbeu ka çuditur të gjithë ditën e mërkurë, teksa ka kërkuar një test miqësor me ekipin e Maliqit. Test, i cili deri në momentin kur ka nisur ka qenë i çuditshëm për të gjithë, duke parë që korçarët do të luajnë në fundjavë me Luftëtarin. Por, nuk ka luajtur ekipi i parë në këtë miqësore.
Në fushë kanë zbritur disa futbollistë që kanë ardhur në provë te korçarët ditët e fundit dhe klubi ka menduar që t’i testojë në fushë. Bëhet fjalë për shtatë futbollistë afrikanë, mbi të gjitha, anonimë, pasi askush deri më tani nuk i di me saktësi emrat dhe profilet e tyre.
Ata janë vënë nën urdhrat e Shehit dhe kanë luajtur testin me Maliqin. Provë, në të cilën ishin edhe disa lojtarë të ekipit U-19 të Skënderbeut.
