Drejtuesit e 5 partive opozitare, aleate të PD-së, Agron Duka, Dashamir Shehi, Nard Ndoka, Fatmir Mediu dhe Vangjel Dule, nga Lezha, ku zhvilluan një takim me mbështetësit e tyre, akuzuan kryeministrin Edi Rama se pasi kapi të gjitha pushtetet, tani po cakton edhe kundërshtarët që do të ketë në zgjedhje.
Ndërsa i drejtuan një thirrje qytetarëve për t’iu bashkuar protestës së 25 majit, drejtuesit e partive opozitare, u shprehën se me Edi Ramën kryeministër nuk mund të garantohet asnjë standard për zgjedhjet.
“Ky po i përcakton kundërshtarët vetëm, po regjistron vetë jashtë çdo rregulli, po i voton dhe thotë kështu bëhet se kështu dua unë”, tha Duka.
Ndërsa kreu i PDK-së, Nard Ndoka tha se Lulzim Basha si lider i opozitës sot ka një përgjegjësi shumë të madhe, përveç aksionit opozitar, përveç kauzës për largimin e kryeministrit, duhet të japim dhe alternativa bindëse për qytetarët dhe tashmë ai ka filluar ta bëjë.
Precedent për largimin e kryeministrit përpara zgjedhjeve ekziston, kujton Mediu, madje shumë pranë nesh.
“Kemi një precedent rajonal, siç është precedenti i Maqedonisë së Veriut ku u ra dakord për qeverisje tranzitore ku Gruevski nuk ishte kryeministër dhe për të përgatitur zgjedhjet”, tha Mediu.
“Ky ka filluar i ka marrë të gjitha. Ky ka vënë ato emrat e lezetshëm, jo tepsia, jo timoni që të qeshin pak njerëzit, mirëpo ky në fakt u ka futur dorën në xhep njerëzve. Domethënë merr paratë e shtetit publik. Ky ka marrë drejtësinë, ky ka marrë ekonominë, edhe Akademinë e Shkencave.
Se për çfarë i duhet Akademia e Shkencave, ka ndonjë peshë për ekonominë? Në këto rrethana bëhen zgjedhjet? Nuk bëhen dot. Ky merr para, media, çfarë zgjedhjesh të bëjmë”, tha Dashamir Shehi.
