Kryetari i opozitës Lulzim Basha ka ripërsëritur ato që theksoi një ditë më parë nga Berati.
“Nuk ka Europë pa zgjedhje të lira! Nuk ka zgjedhje të lira pa votë të lirë! Ky është verdikti i popullit të bashkuar! Nuk ka kompromis me të keqen! Nuk ka pazar me Edi Ramën!” – shkruan Basha në një postim në Twitter.
Postimi i Bashës vjen pas deklaratave të bëra më herët gjatë kësaj të mërkurë nga Presidenti Ilir Meta, dhe reagimi i mëvonshëm i kryeministrit Edi Rama.
Meta u shpreh i qartë se nuk i ul dot dy palët (Edi Ramën dhe opozitën) në tryezë për diskutim.
“Dëgjoj njerëzëz të thotë, ‘çfarë bën presidenti i Republikës?’ Presidenti i Republikës nuk mund të ulë në tavolinë 2-3 njerëz që thonë ‘ne nuk ulemi me atë’. Apo dike tjetër që thotë se 30 qershori do jetë ditë suksesi të madh për demokracinë”, tha Meta.
Ndërkohë, Rama, përmes një postimi në Twitter, deklaroi: “mezi e presim apelin e vonuar të Presidentit në mbrojtje të 30 qershorit”.
