Europa i është bërë “fiksim” Skënderbeut. Aktualisht janë të 6-ët renditje dhe me pikë të barabarta me Laçin e vendit të 5-të (me nga 49 pikë), e megjithatë shanset për të realizuar objektivin e vetëm që u ka mbetur janë ende të mëdha.
Me trepikëshin e javës së fundit që e kanë tashmë në “xhep” (me fitoren 3-0 në tavolinë ndaj Kamzës së përjashtuar), u mbetet vetëm që të mposhtin Luftëtarin, ekip që do ta presin në shtëpi ditën e shtunë. Nëse ndodh kështu, atëherë do të mbyllnin 36 javët e këtij edicioni në kuotën e 55 pikëve, po aq sa ka momentalisht edhe Kukësi.
Nëse ndodh që verilindorët i humbasin që të dyja sfidat e fundit, atëherë kreditet për t’u ngjitur 3 ose 4 kate në renditje ekzistojnë. Edhe pse nga KAS-i ende nuk ka asnjë përgjigje, në Korçë nuk duan që ta diskutojnë përfshirjen në zonën “Euro”. Dhe llogaritë janë të thjeshta; lojtarët duan që të evitojnë penalitetin me dy rroga që ka vendosur presidenti, ndërsa vetë klubi pret të minimizojë një tjetër vit nga dënimi 10-vjeçar që është dhënë nga UEFA.
Kujtojmë se ndaj korçarëve “qeveria” europiane ishte e prerë, ata e dënuan me 10 mospjesëmarrje në Kupat e Europës, që do të thotë, nëse sportivisht renditen në mesin e ekipeve që kapin një vend në këtë kompeticion, atëherë dënimi nga 10 do të shkonte në 8, duke qenë se një është ezauruar nga sezoni i kaluar (kur u shpallën edhe kampionë).
