Tre shqiptarë të akuzuar për prostitucion, dy vëllezër dhe motra e tyre, janë dënuar nga një gjykatë e shkallës së parë në Itali. Gjykata e Novaras dha më 15 Maj dënim me burg dhe gjobë për Eriselda, Naim e Rodrin Selimajn, 36, 29 e 24 vjeç (me origjinë nga Levani i Fierit), me banim në Novara.
Dënimet
Të tre janë dënuar me dy vite burg dhe 500 euro gjobë secili. Për dy vëllezërit dënimi u konvertua në shërbim prove, ndërsa Eriselda, me precedentë të mëparshëm, duhet të vuajë dënimin. Siç raportojnë mediat italiane, trupa gjykuese shfaqi bindjen se, të tre drejtonin “një biznes familjar” të jashtëligjshëm, ku secili kishte detyrat e përcaktuara.
Hetimet
Sipas hetimeve, motra merrej me rekrutimin e vajzave që më pas shfrytëzoheshin për prostitucion. Një nga vëllezërit merrej me mbledhjen e parave, ndërsa i treti i kërcënonte madje edhe i dhunonte fizikisht.
Hetimet nisën pesë vite më parë, pas një kontrolli të rastësishëm të forcave të rendit në Novara. Asokohe, u ndalua një vajzë e cila, pas marrjes në pyetje, tregoi se si shfrytëzohej si prostitutë nga vëllezërit Seliamaj dhe e motra e tyre, të cilët i përshkroi si “subjekte të rrezikshëm e të dhunshëm”.
Vajzat të cilat shfrytëzoheshin, të gjitha nga vendet e Lindjes, transportoheshin me makinë në vendet përgjatë rrugëve në Novara ku ushtronin prostitucion dhe fitimet duhet ti dorëzonin të gjitha te tutorët e tyre. Përveç kësaj edhe dhunoheshin fizikisht.
Viktimat, siç u zbulua nga hetimet në fazën e hershme të gjykimit, iu bliheshin blenë karta SIM telefonike, rroba, pajisje make-upi-i dhe të gjitha materialet e nevojshme për takimet e një natyre seksuale.
“Të lirë në Shqipëri”
Gjyqi filloi në dimrin e vitit 2018 dhe menjëherë avokatët mbrojtës Paolo Mastrosimone dhe Sara Celestino kërkuan lirimin e klientëve të tyre. Pas vendimit, ata kanë deklaruar se do apelojnë çështjen.
“Ajo që denoncoi veprën penale, një tjetër prostitutë, nuk u vu kurrë në dispozicion për të ardhur në gjykatë dhe për t’iu përgjigjur pyetjeve tona dhe të prokurorit. I vetmi dëshmitar që erdhi në gjykatë, deklaroi se vajza kishte probleme dhe që zakonisht denonconte ish-të dashurit e saj. Si të linte të kuptohej se ajo kishte një lidhje me një nga vëllezërit shqiptarë”, citohet nga “Novara Oggi” një prej avokatëve.
“Nuk ka prova për, prandaj ne prisnim lirimin. Të tre vëllezërit nuk janë aktualisht në burg dhe janë në Shqipëri”, shtoi ai.
/Boldnews.al – Burimi: novaraoggi/
