Nga Ilir Kalemaj
Efektet e Brexit duket se po prodhojnë tre reagime të forta:
Së pari, po provokojnë luhatshmëri të madhe të tregjeve, e cila ndikon jo vetëm Britaninë por dhe Tregun e Përbashkët Europian në Përgjithësi.
Së dyti sjell shkëputjen potenciale të Skocisë që mesa duket ka zgjedhur të qëndrojë në BE dhe me shumë gjasa dhe të Irlandës së Veriut, duke çuar në shpërbërje të konoslidimit të projektit nacional që bashkë-ndanin shumica e avokatëve të Brexit.
Së treti, po konsolidon reagimet euroskeptike që bëjnë thirrjë për Francexit apo Dutchexit nga Marine Le Pen në France te Geert Wilders në Hollandë, apo Renxit i Lega Nord-it në Itali.
Britania e Madhe pas ndjekjes së procedurave që zgjasin minimalisht dy vjet dhe që me shumë gjasa do të ndiqen nga kryeministri i ri ku kandidat kryesor mesa duket do të jetë Boris Johnson që udhëhoqi fushatën e Brexit, do përpiqet të ruajë një marrëdhënie preferenciale me Brukselin, sipas modelit të Zonës Ekonomike Europiane ku aktualisht bëjnë pjesë Islanda, Norvegjia dhe Lihteshtenji ose një marrëdhënie partneriteti si ajo me Zvicrën.
Fakti që Britania e Madhe ka refuzuar qysh herët pjesmarrjen në Schengen apo Eurozonë apo përjashtimin që ka marrë qysh herët nga kolona e tretë e integrimit (Drejtësia dhe Cështjet e Brendshme) që përfshijnë drejtësinë dhe sigurinë apo refuzimi i Kartës së të Drejtave Themelore, e reduktojnë ndjeshëm efektin praktik të Brexit.
Gjithashtu Britania e Madhe ka pasur rol të rëndësishëm pro-zgjerimit, vençarisht përsa i përket Turqisë, por rol përgjithësisht refraktar dhe neglizhues për vendet e Ballkanit Perëndimor, ku përfshihet edhe Shqipëria. Efekti i daljes së Britanisë së Madhe paradoksalisht mund të kombinojë me përshpejtim të integrimit të rajonit in block, përfshirë Shqipërinë, për të forcuar kufijtë e jashtëm të BE, garantuar qëndrueshmëri më të lartë në planin e brendshëm dhe reduktuar forcat në rritje euro-skeptike.
Ndërsa efekti financiar nga Brexit, të paktën nga këndvështrimi i Shqipërisë, ka për të qenë mjaft i reduktuar për shkak se Britania nuk hyn te partnerët tregtarë kryesorë të vendit dhe forca e remitancave të 30 mijë shqiptarëve të Shqipërisë në Britaninë e Madhe (të paktën duke iu referuar statistikave zyrtare), është e papërfillshme për të shkaktuar ndonjë cunami, valët e të cilës do të arrinin deri te ne.
