Bruno Telushi i pezulluar dhe Hektor Idrizaj i dëmtuar janë mungesa të deklaruara për Partizanin në transfertën e Durrësit. Rubin Hebaj akoma nuk e ka kaluar dëmtimin dhe nuk llogaritet as për Teutën, bashkë me kapitenin Hoxha që ka një problem shëndetësor. Ndonëse stafi e ka disi më të plotë grupin me rikthimin e Asanit dhe Mensah nga pezullimi në derbi, sigurimi i titullit para kohe sjell revolucion në formacion.
Trajneri Gega e pohoi dje se duke nisur nga ndeshja e sotme me Teutën do t’u japë mundësi aktivizimi lojtarëve të stolit. Pra, ata që kanë pasur hapësira të pakta, do ta shikojnë veten titullarë në Durrës. Gjithsesi, trajneri shprehu besim se ata që do të jenë sot titullarë, do ta përfaqësojnë denjësisht fanellën që mbajnë veshur, kështu që nuk ka arsye për mosangazhim. Tri javët e mbetura mund t’u shërbejnë këtyre lojtarëve që të tregojnë veten dhe të mbeten pjesë e “demave”. /Panorama Sport/
