Në përfundim të ndeshjes me Luftëtarin, në kampin e kuq nis një kapitull i ri, kryesisht për drejtuesit. Sezoni quhet totalisht pozitiv, pasi ekipi ka kthyer titullin pas 26 viteve, por kjo nuk e anashkalon bilancin dhe analizën me detaje për të gjithë pjesëtarët e skuadrës.
Drejtuesit prej kohësh kanë nisur punën për përforcimin e grupit, me shpresën për të bërë një paraqitje pozitive në Europë. Për momentin te “demat” po flitet vetëm për merkaton në hyrje, por edhe largimet janë të pashmangshme. Këtë proces të kuqtë pritet ta bëjnë pas përfundimit të sezonit, duke i lënë të gjithë që të gëzojnë titullin kampion.
Te merkatoja në dalje bëjnë pjesë dy kategori, ata që nuk kanë justifikuar pritshmëritë, apo që kërkojnë më shumë minuta në dispozicion, si dhe 2-3 elementë që mund të shiten nga klubi, me shpresën për të majmur financat. Partizani nuk është se ka qëlluar shumë në shenjë në dy merkatot e zhvilluara. Madje, disa nga ata që erdhën në verë u larguan pa ardhur dimri. Këtë fat pritet ta kenë edhe disa të tjerë që erdhën në janar, por që nuk e gjeten veten.
