Gazetarja serbe e “TV Pink”-ut, e gjeti krejtësisht të paarmatosur Edi Ramën, që zakonisht është i përgatitur kur e pret një gazetar. Ajo, përveç që i ilustroi simbolin nacionalist serb me tre gishtat, e quante Kosovës në pyetjet e saj ia shtonte edhe pjesën “Metohija”. Kjo nuk e pengonte Ramën që t’i përgjigjej.
Kryeministri Edi Rama është arrogant me gazetarët shqiptarë. Në Shqipëri i ka emëruar që moti mediat ‘kazan’, e në pothuajse çdo konferencë a intervistë të tij në Kosovë, më shumë se sa të përgjigjet si Kryeministër, ai i ka tentuar të marrë në pyetje gazetarët.
Kështu nuk ka vepruar ai me gazetaren e televizionit serb “Pink”, e cila u ndie aq rehat në zyrën e shefit të qeverisë shqiptare, aq sa të ilustronte simbole si ai i ‘tre gishtave’, shkruan Gazeta Express.
Përvec kësaj, kur gazetarja po e pyeste Ramën për Kosovën dhe vendimet e institucioneve, po i drejtohej si “institucionet e përkohshme në Kosovë e Metohijë”. Ramën, që e pengon çdo gjë te gazetarët, nuk po e pengonte mënyra si po i parashtronte pyetje gazetarja serbe.
Në mungesë të informimit të saktë për atë se cka u ndodhë shqiptarëve në Serbi, Kryeministri Rama e pranoi si të mirëqenë versionin që gazetarja ia tha për një bukëpjekësin shqiptar në Serbi. Ky tha se ka dëgjuar se është dëbuar shqiptari, e ajo tha se nuk është dëbuar. Nuk u përmend asnjë torturë që i është bërë kosovarit në Serbi.
Bukëpjekësi për disa javë është përballur me reagime të ashpra të serbëve pranë furrës së tij, vetëm pse vëllai i tij kishte postuar fotografi me simbolin e shqiponjës në Facebook. Tutje shqiptari kishte kërkuar falje u dha bukë falas vetëm që të pranohej nga banorët nacionalistë serbë.
Kjo temë u kalua shpejt në zyrën e Ramës, me versionin e gazetarës së “Pink”-ut.
“Nëse unë dal nëpër Tiranë me tre gishtat lart, sa e sigurt jam?”, pyeti ajo. Kryeministri shqiptar iu përgjigj se asgjë nuk do t’i ndodhte, por edhe nëse do të kërcënohej shtoi me shaka se do të dilte vetë për ta mbrojtur.
Derisa Presidenti Hashim Thaci vetëm pak ditë më parë shkroi se sa herë që takohet me Ramën, flasin për bashkimin e Kosovës me Shqipërinë, Rama thotë se kurrë s’ka qenë qëllim i tij një “Shqipëri e Madhe”.
Ai tregon se ashtu siç do që të hiqen kufijtë me Kosovën, do që të hiqen edhe kufijtë me Serbinë, ndonëse Shqipëria nuk kufizohet me shtetin e Aleksandër Vuciqit.
“Nuk dua kufirin me Kosovën, Malin e Zi, Maqedoninë, Serbinë. Duhet të punojmë për ta bërë atë të ndodhë”, tha Rama.
Kosova ndërkaq mund ta falëndërojë Ramën që edhe në këtë intervistë në televizionin serb, tha se “Kosova është sovrane dhe Serbia duhet ta pranojë këtë”
Për Vuciqin, të fundin por jo më pak të rëndësishmin për Ramën, kryeministri kishte thënë se e ka quajtur disa herë ‘mik’ kreun e Serbisë.
Kjo nxiti reagime në Kosovë pasi mirësjellja e vazhdueshme e Ramës kundrejt Vuciqit, nuk konsiderohet e duhura, marrë parasysh gjuhën që e përdorë presidenti serb për shqiptarët. /Express/
