Profesori i njohur, Përparim Kabo, zbuloi një sekret nga sezoni i Partizanit, ku u shpall kampion. Në studion e “Procesit Sportiv”, ai deklaroi se ka qenë psikologu i ekipit të Partizanit këtë sezon, duke treguar edhe disa prapaskena nga ky sezon i gjatë, dhe takimet me lojtarët.
“Meqë e zbuluat, po e them edhe për respekt të spektatorëve. Zbulove një sekret, sepse kjo ka qenë një marrëveshje që kam bërë me presidentin Demi, dhe drejtuesin teknik Olsi Rama.
Nga vjeshta, zoti Demi më bëri një ftesë për të takuar të gjithë ekipin. Jemi takuar në një restorant, dhe i kam folur lojtarëve duke iu referuar numrave që mbanin mbi fanellë, dhe personaliteteve historike që e kishin mbajtur mbi shpinë.
U krijua një emocion i madh aty. Pas asaj darke, pata rastin të takohem me disa prej tyre. U takova me Telushin, dhe i thashë: “Telush, ky është kampionati yt. Ti duhet të luftosh të kthehesh në ekipin Kombëtar, që e meriton atje.”
Fola me Asanin, dhe i mora si model një nga mëngjerashët më të mëdhenj që ka pasur historia e futbollit shqiptar, Refik Resmjen. Fola me Kalarin, por fola goxha gjatë me Hebajn. I thashë që ti ke vetëm një ngërç psikologjik. Partizani ka pasur më herët një lojtar si ai të gjatë, pak të avashtë, Selami Danin. Dhe në ndeshjen me Tiranën që u fut, Hebaj shënoi dy gola.
U punua në disa drejtime. Një drejtim ishte afeksionimi i ekipit me historinë. Festuam 80-vjetorin e Panajot Panos, pastaj 35-vjetorin e ndarjes nga jeta të Loro Boriçit. Në disa nga ndeshjet më të vështira, përmes presidentit, unë çoja një skemë me 10 pika, si ndërtohet psikologjikisht ndeshja. Si fitohej një derbi, si fitohej një ndeshje me ekipin e fundit. Si fitohet me rivalin direkt.
Momenti më interesant ka qenë ndeshja e fundit me Skënderbeun, në fillim të fazës së katërt. Unë do i çoja pikat të nesërmen, por atë natë më shkruan presidenti dhe më thotë: “Profesor, të lutem ato pikat mos i harro”.
Unë iu përgjigja: “Do t’i çoj nesër”. Dhe më pas më tha se nuk i dilte e keqja nga ajo humbje me Gjirokastrën, pasi qe mundur 3-1. Unë e pashë që ishte i shqetësuar, dhe i shkruajta që atë natë dhe ia nisa.
Dje e urova, dhe i thashë se ke meritën e madhe, se të tjerët e krijuan këtë klub, ndërsa ti e ringjalle sepse po humbte në histori. Ai me modestinë që e karakterizon, më tha: “Të paça vlla, e bëmë bashkë këtë gjë”.
Drejtori teknik ka detyrat e tij në një klub. Trajneri në një farë mënyre është psikologu i ekipit, por ai komunikon më shumë për skemat, për vendosjen, për ritmin, për ato elementë që bëjnë lojën. Ndërsa psikologu merret me aspektin psikologjik të njeriut, se si sillet ai me lojën. Në ndeshjen me Tiranën që Hebaj bëri dy gola, unë i thashë: “Përgatituni që golin e parë mund ta shënojë kundërshtari. Dhe ashtu ndodhi. Përgatituni që gjyqtari mund të mos jetë me ju, por merruni me lojën.”
Bazuar te eksperienca dhe mënyra si zhvillohet futbolli, të gjitha ekipet në Shqipëri kanë nevojë për psikolog, edhe ekipet Kombëtare, dhe sidomos moshat” – deklaroi profesor Kabo.
