Pjesëmarrje e qytetarëve të maskuar në protestat e opozitës është bërë shkak të thirrjeve nga policia për mospërdorimin e tyre. Kreu i FRPD-së Blendi Këlliçi ka deklaruar se arsyeja pse protestues vijnë të maskuar është për të mos u identifikuar, pasi janë kërcënuar për pjesëmarrjet në protestë.
“Nuk ka pse të ketë asnjë shqetësim. Duhet të kemi shqetësimin e njerëzve të infiltruar nga ministri i Brendshëm për akte dhune. Do të jetë një tubim marshim. Janë me mijëra qytetarë që janë përgjigjur në kohë rekord. Duke qenë se kemi pasur një numër rekord persona të proceduar, ka shumë të rinj që mbajnë maska për të mos u identifikuar, por të jeni të bindur që nuk do të ketë asnjë akt dhune. Shumë të rinj kanë marrë telefonata duke u kërcënuar që të mos marrin pjesë në protestë”, tha Këlliçi për A2 CNN.
