Rreth 50 persona ndodhen të arrestuar, ndërsa 40 të tjerë do të ndiqen në gjendje të lirë, pas protestës së djeshme të opozitës.
Megjithëse ende nuk ka një njoftim zyrtar nga policia mbi atë që po ndodh, burimet raportojnë për një numër të lartë qytetarësh që janë ndaluar para dhe pas protestës.
Ata ndodhen në mjediset e Drejtorisë së Policisë së Tiranës dhe komisariatet e kryeqytetit, ndërsa janë të paktën 3 prokurorë që vijojnë hetimet.
Sikundër raportohet, prokurorët dhe oficerë të policisë gjyqësore po analizojnë pamjet filmike dhe po mbledhin provat lidhur me rastet e dhunës së protestuesve ndaj institucioneve dhe forcave të rendit.
Por ende nuk dihet nëse prokuroria do të nisë hetimet ndaj oficerëve të policisë për dhunën e ushtruar nga policia mbi qytetarët, ku rasti më flagrant është ai ndaj Sekretarit Organizativ të PD-së, Sait Dollapi.
