Nga Boldnews.al
Edi Rama dhe shpura e tij qeveritare po përgatisin planin propagandistik për të justifikuar dështimin për hapjen e negociatave me Bashkimin Europian, duke fajësuar “armiqtë e jashtëm”, pra grupe euro-skeptike, dhe “armiqtë e brendshëm”, opozitën.
Por, përtej propagandës së dalë boje tashmë, kancelaritë perëndimore e kanë të qartë që problemi kryesor i Shqipërisë është keq-qeverisja dhe lidhjet e saj të forta me krimin e organizuar.
Nënkryetari i grupit parlamentar të CDU/CSU, Johann Wadephul, në një intervistë për gazetën “Shekulli”, vuri gishtin mbi plagën kryesore të shtetit shqiptar. “Zbatimi i ligjeve është veçanërisht i rëndësishëm. Ligjet shqiptare, për shembull, ndalojnë blerjen e votave”, tha ai.
Më tej, zyrtari i lartë gjerman e materializon kritikën e tij për autoritetet shqiptare: “Megjithatë, nuk ka ndjekje penale nga zyra e prokurorit publik dhe nuk ka arrestime kundër atyre personave, të cilët kanë dëshmuar se kanë blerë votat me anë të regjistrimeve të përgjimit”.
Wadephul paralajmëroi se: “Nëse nuk ka progres të vërtetë këtu shumë shpejt, grupi im nuk do të jetë në gjendje të pranojë hapjen e negociatave të pranimit. Sepse kjo është një çështje themelore e sundimit të ligjit dhe është ajo që duhet të garantohet”.
Kritikat e deputetit të rëndësishëm të Bundestagut, megjithëse jo nominalisht, i drejtohen të paktën 3 persona me pushtet në Shqipëri.
I kritikuari i parë është natyrisht kryeministri, Edi Rama. Ai konsiderohet si ideatori, frymëzuesi dhe zbatuesi i projektit të blerjes së votave. Një “ushtri” e tërë vartësish të tij janë angazhuar në zgjedhjet e fundit për blerjen e votave dhe për kërcënimin e qytetarëve nëpërmjet grupeve kriminale.
Këto të dhëna janë në dosjet e Prokurorisë, por vullneti politik i Edi Ramës i ka bllokuar arrestimin e zyrtarëve rilindas, përfshirë Vangjush Dakon, Damian Gjiknurin, etj, dhe bashkëpunëtorëve të tyre kriminalë.
E kritikuara e dytë është Kryeprokurorja e Përkohshme, Arta Marku. Me emërimin e saj anti-kushtetues dhe anti-ligjor vetëm me 69 votat e socialistëve të Edi Ramës, dosjet me bisedat e përgjuara të zyrtarëve të lartë për pazare votash, janë stopuar totalisht.
Pavarësisht se media ka publikuar të dhëna tronditëse për lidhjet e maxhorancës me grupet kriminale për tjetërsimin e votave, Arta Marku dhe “shoqëria” e saj në krye të strukturave të Prokurorisë, nuk ka hedhur asnjë hap për vendosjen para drejtësisë për përgjegjësit e vjedhjes dhe blerjes së votave.
E kritikuara e tretë është Shefja e Krimeve të Rënda, Donika Prela. Ajo gjendet në krye të strukturës më të rëndësishme të Prokurorisë shqiptare me qëllimin e vetëm për të bllokuar avancimin e hetimeve ndaj Dakos, Gjiknurit, Ulsi Manjës, Alket Hysenit e të tjerë personazhe të afërt me Edi Ramën.
Edhe këtë mision, Prela nuk po e përmbush siç duhet. Disa prej përgjimeve, sidomos ato ku Dako komunikonte me anëtarëve të një bande kriminale për blerjen e votave, u publikuan, pavarësisht vullnetit të Donika Prelës për t’i bllokuar.
Gjithësesi ajo, nën drejtimin e Arta Markut dhe me urdhërin politik të Edi Ramës, ka bërë aq sa ka në dorë-ka bllokuar tërësisht hetimet dhe, të paktën sa të jenë në detyrat aktuale këta 3 persona të kritikuar nga Gjermania, as nuk shpresohet për arrestime.
