Nga Boldnews.al
Sondazhet na nxjerrin si popullin më pro Europian dhe Amerikan. Përtej histerizmit publik për tu treguar të devotshëm në integrimin kah botës Perëndimore, sërish mbesin në klithje nevoje për të qenë si gjithë pjesa tjetër e vendeve të Përëndimit edhe në sjellje. Por një ngërç na mban të izoluar, duke e dashur Europën në shpirt, por me duar të lidhura nga politika, veçanërisht kjo e gjashtë viteve të fundit.
Po cila Europë do na qaste kur sot vendi është në pikën më kritike të ekzistencës së shtyllave të demokracisë? Tre nga elemntët kryesorë të saj, që bota Perëndimore e ka instaluar prej shekujsh e vitesh, janë zgjedhjet e lira, pluralizmi politik dhe zbatimi i lirive dhe të drejtave të njeriut.
Që të treja sot në “Shqipërinë pro Europiane” mungojnë. Më 21 shkurt të këtij viti ra Parlamentarizmi, kur opozita zyrtare e gjitha në grup doli jashtë institucionit, duke djegur mandatet, e mbi të gjithë në mosnjohje të Parlamentit dhe qeverisë të dalë prej saj. Nuk janë më thjesht dyshime, por fakte të forta se pushteti i sotëm i Ramës pati shtysë nga krimi i organizuar, i lidhur fort me Rilindjen e tij, duke u angazhuar në shitblerjen e votave.
Liritë dhe të drejtat e njeriut shkilen çdo ditë kur qytetarët përballen me zyrat e shtetit. E drejta e pronës u mohohet, drejtësinë nuk e gjejnë kurrë, për aq kohë sa është e kapur nga darët e pushtetit. Por në publik edhe Rama bret për Europën. Shfaqet si një politikan i “moderuar” që kërkon integrimin e vendit, por punon çdo ditë që Shqipëria t’i qëndrojë gjithnjë e më larg BE-së.
Integrimi për të do të thotë pamundësi për të kontrolluar institucionet, pasiguri për të lodruar me botën e oligarkëve të tij dhe mbi të gjitha do i ikin nga “lozha” që përcakton pushtetin, bota e krimit të organizuar. Pa to, Rama mbetet si njeriu pa oksigjen.
Zgjedhjet e lira që janë të kushtëzuara në Europë, janë termi që Rama nuk do ta aplikonte kurrë, sepse kjo i rrezikon pushtetin e tij. Flasim për ditën e Europës, por kryeministri në çdo fjalë përmend burgun.
Në qeli për gjashtë vite qeverisje të tij kanë kaluar mijëra qytetarë që nuk kishin mundësi të paguanin energjinë elektrike, qindra të tjerë që ndërtuan një çati shtëpie të rënë, por mbetën qelive me akuzën për “ndërtim të paligjshëm”.
Ndodhen qindra të mitur nëpër burgje, të cilët të pashkolluar dhe me probleme të mëdha sociale, u detyruan t’i futen botës së krimit të vogël… Por sot “festojmë” 9 Majin, ditën e Europës…! Ditë e zëzë për kryeministrin.
