Skuadra e Skënderbeut është mposhtur me rezultatin 3-1 në ndeshjen e dytë gjysmëfinale të Kupës së Shqipërisë përballë Kukësit, duke i shuar kështu përfundimisht shpresat për trofe këtë sezon.
Një rezultat vërtetë zhgënjyes pasi pritshmëritë e tifozëve korçarë që skuadra e tyre e zemrës të shkonte në finale ishin të mëdha, aq më tepër kur drejtuesit e klubit kishin vendosur dhe 70 mijë europ premio për fitimin e trofeut.
Rezultati në Korçë është zhbllokuar nga Rexhinaldo në minutën 19-të të takimit, ndërkohë që ende pa përfunduar pjesa e parë rezultati është dyfishuar pas autogolit të Abazajt,.
Ndërkohë sapo ka nisur pjesa e dytë ka qenë Bregu i cili ka shënuar për korçarët duke ngushtuar diferencat, por gëzimi ka zgjatur vetëm pak, pasi në minutën e 58-të të takimit Rama ka trefishuar për skuadrën kuksiane, duke vulosur kështu dhe kualifikimin për në finale.
Kukësi kualifikohet për herë të dytë në finale të Kupës së Shqipërisë.
Tashmë korçarëve nuk ju mbetet gjë tjetër veçse të kërkojnë pjesëmarrjen në kupat e Evropës përmes kampionatit.
Ndërkohë që në sfidën tjetër gjysmëfinale, skuadra e Tiranës ka triumfuar me rezultatin 5-r përballë Luftëtarit, duke u bërë kështu finalistja tjetër e kupës së Shqipërisë. /Boldnews.
