Tifozët kuqezinj, edhe nëse nuk e kanë moshën për ta parë nga afër historinë e ngritjes së Milanit në vitet ’80, e dinë shumë mirë se si Silvio Berluskoni e zbuloi Arrigo Sakin.
Në një ndeshje kupe, Saki dhuroi spektakël në “San Siro” me Parmën, që atëherë luante në Serinë B. Berluskonit i bëri aq shumë përshtypje loja e Parmës, saqë vendosi: trajneri i ri i “Djallit” do të ishte i panjohuri Saki, ai që më pas do të shkruante historinë e futbollit.
Tani Berluskoni është magjepsur nga Euzebio Di Françesko: trajneri i Sasuolos triumfoi totalisht dje ndaj Mihajloviçit dhe nuk është një rastësi, sepse që kur Sasuolo është ngjitur në Serinë A, Sasuolo është tallur me Milanin, aq sa ka dhuruar spektakël edhe kur është mundur. Për këtë arsye, pronari i klubit kuqezi ka një ide të guximshme: Di Françesko trajneri i Milanit prej sezonit të ardhshëm, me synimin për të kthyer Milanin te loja e bukur dhe sulmuese, që aq shumë i pëlqen “Kavalierit”.
Mihajloviç ka pasur momente të mira këtë sezon, por nuk i falen luhatjet e mëdha dhe disfatat e turpshme në ndeshje mjaft të lehta në letër, ndaj edhe triumfi në Kupën e Italisë zor se e shpëton, tani që vendi i tretë nuk kapet më. /Sportal
