Valdrin Pjetri, prefekti i Shkodrës dhe një prej kandidatëve kryesore të PS për kryebashkiak, nga sondazhet e brendshme rezulton me një mbështetje nën 35 %. Kjo duket se është arsyeja që Kryeministri Edi Rama po heziton të shpallë kandidaturën e tij si kryebashkiak. Burime nga PS bëjnë të ditur për Boldnews se në 3 sondazhet që janë organizuar, rezultatet e Pjetrit, pavarësisht suportit nga Rama, kanë qenë në shifra zhgënjyese.
Mësohet se rezultatet kanë qenë në ulje për Pjetrin, ç’ka do të thotë se kandidatura e tij, është në pikëpyetje për tu zyrtarizuar. Kjo duket se ka detyruar Ramën që të hezitojë për t’a shpallur zyrtarisht, ndërkohë që ka kërkuar një figurë jo politike për të kandiduar nën siglën e PS. Burimet theksojnë se ashtu si për Durrësin, Rama ka kërkuar që ti jepet prioritet kandidaturave femra. Nuk dihet nëse strukturat e PS do të jenë në gjendje të nxjerrin një kandidaturë alternative, duke pasur parasysh faktin se me datën 8 maj mblidhet Kryesia dhe me datën 10, Asambleja Kombëtarë, e cila përcakton kandidatët. Burimet shprehen se ka pasur përplasje mes kandidaturës së Pjetrit dhe drejtuesve politikë në këtë qark, që kryesohen nga ish-ministri, Ditmir Bushati. Pjetri, djali i ish-kreut të KESH në qeverisjen e PS, Luigj Pjetri, është cilësuar jo me lidhjet e duhura në kryeqendrën e veriut, aq më tepër kur ai nuk gëzon mbështetjen as të shumicës së deputetëve në këtë qark.
Burimet shprehen se kandidatura e tij nuk ka pasur as suportin e drejtuesit politik të PS në këtë qark, Ditmir Bushati, që siç duket po ndikon ndjeshëm në atë që po ndodh me socialistët e Shkodrës. Nuk dihet nëse Rama do të detyrohet që të shpallë Pjetrin si kandidat, apo do të nxjerrë një tjetër emër. Hyrja e Pjetrit në garë detyroi ish-zv.kryeministren Senida Mesi që të tërhiqet nga gara dhe të deklarojë publikisht se nuk ka inspiruar ndonjëherë për kryebashkiake, edhe pse kishte rreth dy vjet që punonte për të marrë mbështetjen.
Por sikundër është raportuar ajo ka pasur përplasje të vazhdueshme me Ditmir Bushatin, që siç duket e spostoi nga gara. /Boldnews.al/
