Agim Zeka, mesfushori i djathtë i dalë nga ekipet zinxhir të Skënderbeut, ka shënuar një dopietë ditën e sotme, teksa luan për llogari të ekipit të dytë të Fortuna Sitard në Holandë.
20-vjeçari, kartoni i të cilit mbahet nga ekipi i Lilës në Francë, është në huazim tek ekipi holandez, dhe po aktivizohet tek ekipi i dytë. Ditën e sotme, në transfertë ndaj ekipit B të Fejnordit, Zeka i dha fitoren Sitardit, me dy gola në minutat e fundit.
Ndeshja shënonte 0-0, dhe në minutën e 77-të, për të zhbllokuar shifrat mendoi Zeka me një goditje fantastike me të majtën nga jashtë zone, që përfundoi në trekëndësh.
Vetëm 4 minuta më pas, ai mori një tjetër top në krahun e djathtë, dhe i vetëm shkoi për të dyfishuar. Fejnordi shënoi në minutën e 88-të, por vetëm sa për të ngushtuar shifrat.
/PANORAMASPORT.AL
