Presidenti i Republikës Ilir Meta, ka rrëzuar sot vendimin e Ministres së Arsimit, Besa Shahini, për shkarkimin nga detyra të Rektorit të Universitetit të Tiranës, Myny Koni.
Në argumentimin ligjor dhe Kushtetues, presidenti Meta, ka gjetur shkelje ligjore në kërkesën e bërë nga MASR, për shkarkimin nga detyra të Mynyr Konit.
Në argumentet ligjorë presidenti thekson se:
Ministria e Arsimit, ka përgjegjësinë e saj të drejtpërdrejtë në mosnxjerrjen në kohën e duhur të aktit nënligjor “Për strukturat e brendshme akademike dhe administrative në institucionet publike të arsimit të lartë”, gjë e cila ka ndikuar edhe në rastin konkret në zbatim të pa unifikuar të ligjit nga strukturat akademike dhe administrative, duke prodhuar konflikt midis tyre.
Pikërisht vonesa në nxjerrjen e këtij akti nënligjor nga Ministri i Arsimit, Sportit dhe Rinisë, e bën të papranueshëm edhe për këtë arsye propozimin e tij për shkarkimin e Rektorit të Universitetit të Tiranës, mbi pretendimin se ka tejkaluar kompetencat në drejtim edhe të administrimit të Universitetit të Tiranës, kjo sepse situata e paqartë ligjore është krijuar nga mosveprimi i vetë propozuesit.
Mos nxjerrja e akteve nënligjore në kohë ka krijuar terren që në institucionet e arsimit të lartë, pra edhe në Rektoratin e Universitetit të Tiranës, të krijohen situata që prodhojnë konflikte midis strukturave akademike dhe administrative, si në rastin konkret që kanë prodhuar kallëzime penale në organin e Prokurorisë, padi gjyqësore në Gjykatën Administrative, dhe situata ndeshjeje të drejtpërdrejta me përplasje midis autoriteteve drejtuese akademike dhe administrative ku palët i janë referuar dhe e kanë interpretuar, një herë, drejtpërdrejt ligjin nr.80/2015 dhe, herë tjetër, aktet e vjetra nënligjore.
Këtë mundësi për të zbatuar aktet nënligjore të vjetra e jepte neni 142, pika 2 i ligjit nr. 80/2015, në të cilën parashikohej se, “Aktet nënligjore, të miratuara para hyrjes në fuqi të këtij ligji dhe që nuk bien ndesh me të, do të zbatohen derisa nuk janë miratuar aktet e nënligjore të parashikuara në nenin 139 të këtij ligji”.
Më tej në argumentin e tij presidenti thekson se Bordi Administrimit i autorizuar nga MASR, për kontrollin dhe verifikimin e punës së drejtuesve të UT, nuk qëndron, madje kanë bërë deklaratë të rreme para autoritetit më të lartë shtetëror siç është institucioni i Presidentit të Republikës.
‘Pretendimi i Ministrisë së Arsimit, i deklaruar edhe në takimin me Presidentin e Republikës, se Bordi i Administrimit, ka përmbushur çdo kërkesë dhe Rektori nuk ka paraqitur çështje për trajtim, pranë tij, jo vetëm që nuk qëndron, por është një deklarim i rremë, përballë autoritetit më të lartë të shtetit, siç është Presidenti i Republikës’, thuhet në argumentin e Presidentit.
Më poshtë keni argumentimin e plotë të presidentit Meta mbi rrëzimin e kërkesës së MASR-së për shkarkimin e Mynyr Konit:
http://president.al/presidenti-meta-dekreton-rrezimin-e-propozimit-te-ministrit-te-arsimit-sportit-dhe-rinise-per-shkarkimin-nga-detyra-te-rektorit-te-universitetit-te-tiranes-z-mynyr-koni-arsyet-e-rrezimit-te-propozi/
