Nga Boldnews.al
Në Bulqizë e gjithë lagjia e vjetër pranë galerive të kromit, është e shtruar në spital. 113 banorë, gra të moshuar, fëmijë e madje edhe të rinj dergjen në shtretërit e pakët të këtij spitali prej tre ditësh. Thuhet se janë helmuar nga uji i ndotuar, ose nga ndonjë shkaktar tjetër që strukturat shtetërore nuk po e “gjejnë” dot, më shumë nga neglizhenca sesa pamundësia.
Ndërsa priten analizat përfundimtare për të mësuar se çfarë e ka shkatuar helmimin e banorëve, mjeku Ramazan Ceni është i bindur se një situatë të tillë e ka shkaktuar uji.“Personat paraqiten me bark dhe të vjella por edhe me dhimbje barku. Helmimi ka ardhur nga uji, fluksi i të prekurve vazhdon”,- thotë ai.
Ceni thotë se situata vijon të jetë shqetësuese, pasi vetëm sot janë paraqitur 6 raste të reja, 2 fëmijë dhe 4 të rritur. Ndërsa mjeku Shahin Kaja, veç ujit të pijshëm thotë se mund të jetë shkaktare edhe ndonjë furrë buke, apo keqbërës.
Hamendje dhe dyshime për këtë situatë të rëndë. Janë 113 njerëz në spital, por strukturat e larta shëndetësore qëndrojnë në kryeqytet, sikur asgjë nuk ka ndodhur. Minimalisht duhet të ishin dërguar mjekë specialistë toksikologë dhe epidemiologë për të parë nga afër situatën. Gjithashtu kampionë uji dhe çdo ushqimi tjetër të konsumuar nga dyqanet e lagjes, apo furra e bukës duhet të ishin në tavolinën e laboratorëve biokimik të shtetit.
Asnjë prej tyre nuk ka ndodhur. Vetëm një ekip i Institutit të Shëndetit Publik ka marrë disa mostra uji për ti dërguar në laborator. E ndërsa në Bulqizë duhej shpallur situata emergjente, kryeministri flet për sigurinë ushqimore. Për masat që do të marrë, gjithnjë në kohën e ardhëshme, ndonëse ka gjashtë vjet që qeveris.
Specialistët e ISHP-së ende flasim me hamendësime, duke dyshuar se shkaktare e kësaj epidemie është uji i pijshëm. Rrjeti në këtë zonë është tejet i amortizuar, ndërsa nuk përjashtohet mundësia që uji i pijshëm të jetë bashkuar me atë që del nga galeritë e minierës, që si pasojë e shpërthimeve bashkohet shpesh me gaz helmues.
