Nga Boldnews.al
Pak para se Rama të përkulej para monumentit në varrezat e dëshmorëve, një grup idhtarësh të komunizmit, nderuan me grusht ndër tëmtha diktatorin Enver Hoxha. Si çdo vit ata ishin të parët që provokuan, por prej të paktën gjashtë vitesh dalin të lirë me fotografitë e Enver Hoxhës.
Një tjetër udhëheqës, “vijim i së shkuarës në gen”, po i nderon kohët e fundit. Ai është kryeministri Edi Rama, i cili dje ka thurur elozhe për Luftën Antifashiste Nacional Çlirimtare (LANÇ), duke bërë ndarjen nga një grup tjetër që dënojnë krimet e komunizmit. Rama u tregua dje një partizan i vërtetë, duke gjetur ca “ballistë” që po i prishin imazhin ‘luftës së ndritur’.
Rama sulmoi hapur Institutin e Krimeve dhe Pasojave të Komunizmit dhe gjeti “forcat e errëta” që sipas tij po përdhosin epopenë e ndritur të luftës çlirimtare. Dhe lufta vazhdon… Jo më me pushkë maleve dhe me nuanca të konfliktit civil, por me deklarata e qëndrime politike, duke kthyer “kinematografinë komuniste” me partizanë e ballistë, të mirët dhe këqijtë. Në reagimin e gjatë u ndal edhe në përplasjet e fundit edhe nga deputetë të tij me kreun e Institutit të Krimeve dhe Pasojave të Komunizmit Agron Tufa.
“Unë nuk i besoj historisë së shkruar nga fitimtarët, por domosdoshmërisë që ta kapërcejmë atë histori duke mos rënë në grackën e asnjë rehabilitimi të bashkëpunëtorëve të fashizmit dhe nazizmit dhe mos lejuar që në emër të studimeve të krimeve të komunizmit t’i cenohet një fije floku kujtdo që mori armët për të luftuar fashistët e nazistët. Qëndrimi është shumë i qartë, çfarë ndodhi dhe si në pikëpamje të luftës për çlirim deri në 29 nëntor 1944 nuk mund të jetë objekt i një instituti që paguhet nga taksat e shqiptarëve”-tha Rama, ndërsa paralajmëroi se tashmë ky institut mund ta ketë kaluar vijën e kuqe që ka vendosur qeveria, teksa shtoi: “i takon Kuvendit që të bëjë vlerësimet e nevojshme në raport me ligjin apo shkeljen e ligjit, apo dënimin e shkaktuar nga një i tillë institut”.
Por kryeministri, që historinë e njeh që nga “momenti kur ai qeveris”, me parimin se “historia jam unë”, sot po tenton të rindezë konflikte dhe hapë debate, për një qëllim të caktuar. Çështja e ndarjes “të majtë e të djathtë”, “partizanë apo ballistë”, në ditët e sotme është një ushqim i skaduar që Rama po e shpërndan si lëmoshë.
Vetëm në këtë mënyrë, duke kthyer dhe rikthyer debate të vjetra dhe pa ndikim në përditshmëri, Rama po tenton ti ikë aktualitetit, problemeve të mëdha që po kalon vendi. Sot problem është papunësia, niveli i ulët ekonomik që po kalon vendi, kapja e të gjithë pushteteve nga qeveria, protestat masive, mungesa e integrimit të vendit drejt BE-së, largimet masive të shqiptarëve në emigracion të paligjshëm, e mbi të gjitha korrupsioni i tmerrshëm që po kalon vendi.
Kjo e fundit është kthyer si armë shfarosëse që po vret shpresën e çdo qytetari që nuk është i lidhur me pushtetin. Megjithatë Rama këtyre çështjeve u ikën edhe me dy fraza tashmë të dalë boje: “fajin e ka opozita dhe media”. Kur të gjitha këto nuk mjaftojnë kryeministri rikthen kohën e luftës, për ti ndarë qytetarët në partizanë dhe ballistë…! Po me gjasë ketë herë nuk do i shkrehë pushka e ndryshkur…
