Në përfundim të javës së 32-të Superiores, Partizani kryeson me 65 pikë dhe pas tij vjen Kukësi me 10 pikë më pak. Kur kanë mbetur edhe 4 ndeshje për t’u luajtur, shtohen shanset që Partizani të shpallet kampion në derbin e javës që vjen. Me një fitore ndaj bardhebluve, automatikisht të kuqtë janë kampionë të edicionit të 80-të të Kategorisë Superiore, pavarësisht se çfarë rezultati do të marrë Kukësi.
Edhe sikur të fitojnë verilindorët në Gjirokastër, me trepikëshin që mund të marrin në derbi, diferenca 10 pikëshe mbetet e pandryshuar. Sipas përllogaritjeve, i bie që të mbeten edhe 3 javë për t’u luajtur, ku në lojë janë 9 pikë. Por ekziston edhe një variant për t’u shpallur kamion në derbi me humbje. Nëse Kukësi mundet në Gjirokastër, Partizani del kampion edhe po u mund nga Tirana në këtë javë.
Sipas këtij varianti, i bie që në përfundim të javës së 33-të Partizani të ketë 65 pikë, ndërsa Kukësi 55. Pra, diferenca mbetet 10, ku në lojë janë vetëm 9 pikë për t’u fituar. Partizani del kampion në derbi edhe me barazim, nëse Kukësi barazon ose humbet në Gjirokastër. Llogaria më e thjeshtë është që Partizani del kampion me dy pikë në katër javë, por i mjafton edhe një pikë në javën e 35-të ndaj Kukësit, edhe sikur të mundet në tri sfidat e tjera.
