Administrata tatimore ka paralajmëruar të gjithë ata që janë banesa me qira duke shfrytëzuar platformat online që të regjistrohen si subjekte për veprimtarinë që kryejnë.
Në prag të çeljes së sezonit turistik, ku kryesisht në zonat bregdetare lëshohen me qira banesa, Tatimet kanë vendosur të paralajmërojnë cilindo që merret me një veprimtari të tillë që të zbatojë ligjet në fuqi, duke u riaktivizuar si subjekte.
Gjatë periudhës 15 – 26 prill 2019, adminstrata tatimore ka identifikuar në rang kombëtar, 564 subjekte apo individë, të cilët ofrojnë struktura akomoduese, nëpërmjet platformave online si Booking.com, Air Bnb, etj.
Deri tani janë kontaktuar 275 individë, si kujtesë për të regjistruar aktivitetin që kryejnë, ndërsa vazhdon informimi ndërgjegjësues për të gjithë personat apo subjektet e identifikuar.
Tatimet sjellin në vëmendje se informacioni i reklamuar në faqet e mësipërme të internetit, është në monitorim nga administrata tatimore, me qëllim identifikimin e atyre individëve, të cilët ushtrojnë këtë aktivitet pa qenë të regjistruar sipas dispozitave të Ligjit Nr. 9920, datë 19.05.2008 “Për Proçedurat Tatimore në Republikën e Shqipërisë”, i ndryshuar.
Ndërkohë sportelet e Shërbimit të tatimpaguesve në të gjithë vendin, ofrojnë informacionin dhe asistencën e duhur, për kategoritë e individëve dhe subjekteve të sipërpërmendura.
