Barush Bregu, 33-vjeçari i arrestuar te Komuna e Parisit në Tiranë pasditen e sotme, dyshohet se është pjesë e grupit të Licajve në Shkodër.
Mësohet se ai është nën hetim që prej muajit gusht 2018, kur një seri ngjarjesh kriminale kishte përfshirë qytetin e Shkodrës. Bregu, akuzohet se është pjesë e grupit Lici.
33-vjeçari, i konsideruar nga policia si një person me rrezikshmëri të lartë, fshihej prej disa javësh në një banesë në katin e fundit të një pallati tek Komuna e Parisit. Bashkë me Barush Bregun u prangos edhe Bajram Çekorja, 21 vjeç, po nga Shkodra, i cili akuzohet se e ka ndihmuar të fshihet.
“Bregu është i dënuar me 4 vite burg për kultivim të bimëve narkotike, e kryer në bashkëpunim, në vitin 2016, si dhe me masë sigurie ‘Arrest në burg’, për armëmbajtje pa leje, pasi në shtator të vitit 2018, gjatë një operacioni të zhvilluar nga Policia, në banesën e këtij shtetasi u gjet një armë zjarri kallashnikov dhe municion luftarak. Gjithashtu ky shtetas është i skeduar si pjesëtar i një grupi kriminal dhe është i dyshuar edhe si autor për ngjarje të tjera të rënda kriminale të ndodhura në qarkun Shkodër më parë, si dhe autor i dyshuar për ‘Trafikim të lëndëve narkotike’”, njoftoi Policia.
