Ish-presidenti peruan, Pedro Pablo Kuczynski i akuzuar për pastrim parash, në një skandal të gjerë korrupsioni, u vendos të enjten në arrest shtëpie në Lima, pas një ndërhyrjeje kirurgjikale që u krye në mënyrë urgjente, raporton media.
Gjykata peruane urdhëroi më 20 prill lënien në burgim të përkohshëm për 36 muaj të Kuczynskit, por ish-presidenti i shtruar në spital që prej 16 prill, nuk u la në burg.
Pedro Pablo Kuczynski, 80 vjeç, u operua në mënyrë urgjente në zemër. Po të njëjtën ditë, gjykata pranoi të zëvendësojë burgimin e përkohshëm me arrest shtëpie, nën masa të rrepta kontrolli, kryesisht ndalimin për të folur me gazetarët dhe lënien e një garancie deri në 27 000 euro.
”Kuczynski doli nga spitali të enjten dhe u shoqërua në shtëpi me ambulancë”, sipas një gazetari të pranishëm në vend.
Pablo Kuczynski, të cilin peruanët e thërrasin me akronimin ‘’PPK’’, në mars 2018 ishte presidenti i parë në detyrë që dha dorëheqjen për shkak të lidhjeve të tij me Odebrecht, pasi ky i fundit konfirmoi se i kishte paguar rreth pesë milionë dollarë për firmat konsulente të lidhura drejtpërdrejtë me kreun e shtetit, në periudhën që ai mbante një post ministri mes periudhës 2004 dhe 2013.
