Shashka dhe tymuese janë hedhur në protestën që po zhvillohet në kryeqytet këtë pasdite, te rreth-rrotullimi i “Sheshit Shqiponja”. Një organizim jo si ai i javës së shkuar, megjithatë ndryshe nga një javë më parë nuk janë shënuar përplasje.
Kreu i FRPD-së Belind Këllëçi u shpreh se do të përshkallëzohen protestat ditët në vijin nëse nuk arrihet në një qeveri tranzitore. Ai tha se para protestës së 11 Majit, do të protestohet para bashkive.
“S’besoj se janë shqetësuese tymueset, janë dekorative përdoren dhe në stadium. Është gjetur një farë forme për të përshkallëzuar protestën. nuk ka dhunë, nuk ka shqetësim as nga shoferët të cilët kanë mbetur në trafik. Kjo tregon se mbështesin kauzën”, tha ai.
Kjo është protesta e dytë në formën e mosbindjes civile e thirrur nga opozita, e cila një javë më parë bllokoi për 60 minuta 5 akse kryesore të vendit. Opozita e bashkuar kërkon largimin e kryeministrit Edi Rama dhe krijimin e një qeverie tranzitore për garantimin e zgjedhjeve të lira e të ndershme. Protestat që po zhvillohen në 12 qarqe të vendit, parashikohen të mbyllen në orën 20:00. /bn/
