Nga Boldnews.al
Kryetari i Këshillit të Lartë të Prokurorisë (KLP), Gent Ibrahimi, ka marrë zotim para kolegëve të tij për t’i organizuar një ceremoni dinjitoze emërimi prokurorit më të ri, Bledar Valikaj, bashkëshortit të deputetes socialiste Ermonela Felaj.
Pasi e emëruan në kundërshtim flagrant me ligjin, tashmë KLP ka vendosur që të nderojë deri në fund burrin e Felajt. Mesditën e së Enjtes, Kryetari i KLP, Ibrahimi dhe anëtari Tartar Bazaj ishin pjesë e ceremonisë solemne të emërimit në detyrë të Bledar Valikaj, të zhvilluar në Prokurorinë e Tiranës.
Çështja për organizimin e ceremonisë solemne për prokurorin Valikaj është diskutuar në mbledhjen e fundit të Këshillit të Lartë të Prokurorisë, në datë 25 Prill 2019.
Anëtari prokuror Besnik Cani, i cili po pret të përballet me Kolegjin e Posaçëm të Apelimit për shkak të problemeve me Vetingun, i ka sugjeruar kolegëve të tij që, për prokurorët e rinj në detyrë, Këshilli i Lartë i Prokurorisë të organizojë ceremoninë solemne të betimit.
Ai solli në vëmendje faktin që ligji parashikon se prokurori duhet të bëjë betimin publik para marrjes së detyrës. Sipas tij, ligji nuk parashikon se ku duhet bërë ky betim, ndaj Këshilli i Lartë i Prokurorisë e ka për detyrë të përcaktojë vendin.
Propozimi i anëtarit Cani, pavarësisht se dukej në terma të përgjithshëm, në fakt lidhej drejtëpërdrejtë me bashkëshortin e deputetes Felaj. Këtë detaj e zbuloi vetë kryetari i KLP-së, Gent Ibrahimi.
Ky i fundit, pasi e konsideroi me vlerë propozimin e Canit, deklaroi para anëtarëve të tjerë se do të kontaktonte vetë personalisht me drejtuesen e Prokurorisë së Tiranës, Elizabeta Imeraj, për ta pyetur nëse ishte bërë ceremoni betimi për prokurorin e sapo-emëruar, Bledar Valikaj.
Gent Ibrahimi nuk e përmend nominalisht burrin e Ermonela Felaj, por i referohet atij, kur shprehet se: “jemi dakord që të bëjmë një ceremoni publike për prokurorin e emëruar në mbledhjen e kaluar të Këshillit të Lartë të Prokurorisë”.
Bledar Valikaj u emërua prokuror, në kundërshtim flagrant me Kushtetutën dhe ligjin në mbledhjen e parafundit të Këshillit të Lartë të Prokurorisë, e zhvilluar në datë 15 Prill 2019.
Bledar Valikaj ka punuar prej vitesh si oficer i Policisë Gjyqësore në disa prokurori të Shqipërisë. Në vitin 2015, ai shpallet fitues i një konkursi të zhvilluar nga Prokuroria e Përgjithshme për një post prokurori, bazuar në ligjin e vjetër.
Pasi u shpall fitues, emri i tij i dërgohet Presidentit të Republikës për dekretimin e tij si “prokuror në Kukës”.
Kreu i shtetit të asaj kohe, Bujar Nishani, nuk e dekreton propozimin e Prokurorit të Përgjithshëm, duke e rrëzuar në heshtje kandidaturën e Valikajt për prokuror.
Pas refuzimit në heshtje, bashkëshorti i deputetes Felaj i drejtohet gjykatës administrative. Në padinë e tij, Bledar Valikaj kërkon nga gjykata që të urdhërojë Presidentin për t’u shprehur, si edhe të pranojë me dekret propozimin e Prokurorit të Përgjithshëm.
Gjykata Administrative, e shkallës së parë dhe e Apelit, vendosën në favor të Valikajt dhe urdhëruan Këshillin e Lartë të Prokurorisë për ta emëruar prokuror.
KLP vendosi emërimin e Bledar Valikaj në detyrën e prokurorit në Tiranë. Nëpërmjet kësaj vendimmarrje, Këshilli i Lartë i Prokurorisë tejkaloi çdo lloj parashikimi ligjor.
Së pari, Kushtetuta përcakton se prokuror mund të zgjidhen vetëm ata që kanë përfunduar me sukses Shkollën e Magjistraturës. Bledar Valikaj nuk e ka përfunduar këtë shkollë.
Së dyti, propozimi i Prokurorit të Përgjithshëm të kohës ishte që “Bledar Valikaj të emërohet prokuror në Kukës”.
Por Këshilli i Lartë i Prokurorisë e ka parë të arsyeshme që ai të emërohej në Tiranë, për të qëndruar pranë familjes dhe bashkëshortes së tij, deputetes Felaj.
Pra, KLP është treguar shumë më bujare me Bledar Valikajn-jo vetëm që e ka emëruar prokuror në kundërshtim me Kushtetutën, por edhe ka vendosur që ai të japë kontributin e tij në Prokurorinë e Tiranës, pasi Kukësi është larg kryeqytetit.
Ndërkohë, emri i Valikajt ka sjellë një pështjellim ndërmjet KLP-së dhe Komisionit të Vetingut. Dy institucionet nuk po mirëkuptohen se kush duhet t’ia bëjë Vetingun bashkëshortit të deputetes Felaj.
Me shumë mundësi, ai do të ushtrojë detyrën e prokurorit pa kaluar në Veting, duke shënuar një rast “përjashtimor”.