Në datën 6 maj do të mbërrijnë në Tiranë një grup deputetësh holandezë, nga komisioni i integrimit, të cilët do të shohin ecurinë e të gjithë reformave dhe zhvillimet politike në Tiranë, para se të merret vendimi për çeljen, apo jo, të negociatave mes Shqipërisë dhe Bashkimit Europian.
Agjenda zyrtare e vizitës së tyre nuk është përcaktuar, por pritet që deputetët holandezë të takohen në Tiranë me Kryeministrin Rama, por edhe kreun e Partisë Demokratike, Basha. Vizita e tyre do të zhvillohet vetëm dy ditë para se në kryeqytet të mbërrijë Përfaqësuesja e Lartë e Bashkimit Europian për Punët e Jashtme dhe Politikën e Sigurisë, Federica Mogherini.
Deputetët e holandezë do të përcjellin në Parlamentin e tyre edhe një raport në lidhje me rezultatet e kësaj vizite, që vjen pak javë pasi ata miratuan një rezolutë ku i kërkohet Qeverisë së Mbretërisë së Holandës t’i kërkojë Komisionit Europian pezullimin e përkohshëm të udhëtimit të shtetasve shqiptarë pa viza në zonën “Schengen”. Holanda ka qenë një prej vendeve më skeptike për sa i përket nisjes së bisedimeve me Shqipërinë.
