Nga Boldnews.al
Delegacioni shqiptar ra në sy edhe në Berlin. Më shumë se për “bëmat e kryeministrit”, ishin hijet e dy ministrave me “përvojë” të madhe, Gent Cakaj dhe Elisa Spiropali. Fytyrat e tyre të imëta ishin stampuar në një gëzim të pashpjegueshëm, kur panë kancelaren gjermane Angela Merkel, që t’i shtrëngonte dorën “Skënderbeut”, Edi Rama.
Nuk kaloi gjatë dhe njoftimin e parë e dha Elisa. Nuk duronte dot më pa i shkruar disa rreshta, ashtu siç ajo di të bëjë më mirë, me një fjalor të “përzgjedhur”, aq sa kishte mbetur e “mbresuar” fort, fort.
“Ndaj me ju këtë foto nga takimi i Kryeministrit me Kancelaren Merkel të cilën pata fatin ta takoj dhe ta dëgjoj nga afër me interes të madh, shumë e mbresuar nga qartësia dhe njohuria e saj deri në detaje mbi situatën në Shqipëri dhe proceset në rajon”, shkruajti Spiropali.
Njëkohësisht Rilindja, ashtu sikurse pritej, shpërndau në rrjetin e saj të merimangës propagandistike foton e Ramës me kancelarin Merkel. Sa like u bënë dje, histerizëm pa fund, por më “mbresues” (fjalë e përzgjedhur nga fjalori ‘Enciklopedik’ i Spiropalit), ishte edhe reagimi i ministrit 28-vjeçar Gent Cakaj, por me 14 vjet “përvojë” të madhe politike dhe me tre mastera të kryera në një vit….
“Takimi me Kancelaren Angela Merkel konfirmoj edhe një herë mbështetjen absolute të Gjermanisë për çeljen e negociatave për anëtarësim të Shqipërisë në BE”,- shkruan Cakaj. Më tej zëvendësministri me autorizim ministri të lëshuar nga kryeministri, shtoi se progresi i Shqipërisë, me në fokus Reformën në Drejtësi merr vlerësim të lartë nga Gjermania, ndërsa theksoi se Shqipëria do të vijojë të luajë rolin e pazëvendësueshëm në stabilitetin rajonal.
“Progresi i madh i Shqipërisë në 5 prioritetet kyçe, me theks të veçantë në reformën në drejtësi, merr vlerësimin më të lartë nga Gjermania. Shqipëria do të vazhdon të luaj rolin e saj të pazëvendësueshëm në stabilitetin rajonal dhe afirmimin e vlerave evropiane në Ballkanin Perendimorë! Shumë mirënjohës për përkushtimin e Kancelares Merkel ndaj Shqipërisë!”-përfundoi Cakaj.
Shpejt ka marrë vesin e mashtrimeve, pasi mediat ndërkombëtare, veçanërisht ato gjermane, konfirmuan se në samitin e Berlinit nuk është diskutuar për asnjë moment çështja e integrimit të Ballkanit Perëndimor. Në fokusin kryesor të takimeve ka qenë çështja Kosovë-Serbi dhe qëndrimi i prerë i kancelares Merkel dhe presidentit Macron për të mos lejuar dhe pranuar asnjë marrëveshje, që ka si qëllim korrigjimin e kufijve në Ballkan.
Të telendisurit e këtij samiti, ishin kryeministri Edi Rama, presidenti i Kosovës Hashim Thaçi dhe presidenti i Serbisë Aleksandër Vuçiç. Ishte kjo treshe që hodhi idenë e madje shkoi deri në detajime për korrigjim kufijsh mes Kosvës dhe Serbisë, çka për ta do sillte paqen e madhe.
Nisma është parë me shqetësim veçanërisht nga kancelaria gjermane, e cila prerazi vendosi diktatin e saj që kjo marrëveshje nuk do të ndodhë, e nuk mund të pranohet nga BE, pasi përbën rrezik për destabilizimin e të gjithë Ballkanit.
Përfaqësimi i shqipërisë me kryeministrin Edi Rama dhe dy “ministrushët” e tij të vegjël, më shumë se grotesk ishte një sinjal i fortë se BE pavarësisht kupetrurës diplomatike nuk mund të pranonte lujërat e tre personazheve që për interesa personale po “akuzohen” për: “zjarrvënie të Ballkanit në bashkëpunim, e mbetur në tentativë”.
