Policia e Gjirokastrës ka vënë në pranga një 28-vjeçar pasi ka tentuar të vjedhë një të moshuar të cilën e ka dhunuar. Burime zyrtare pohojnë se është arrestuar shtetasi Ndriçim Dervishaj, banues në Vlorë.
I riu ka hyrë në banesën e 2 të moshuarve në fshatin Likomil, në Dropullin e Sipërm, me qëllim për të vjedhur. Në banesë ka qenë vetëm gruaja, 71-vjeçarja me iniciale E.DH., pasi bashkëshorti i saj kishte ikur me bagëti. Ai është futur në oborr dhe ka ushtruar dhunë mbi të moshuarën, duke i mbyllur gojën me qëllim që të hapte banesën dhe të tregonte lekët e të mos bërtiste.
Në përpjekje e sipër, 71-vjeçarja ka mundur të kërkojë ndihmë duke bërtitur. Në këto kushte autori është larguar me vrap pa vjedhur gjë në banesë.
Banorët e fshatit kanë lajmëruar Stacionin e Policisë Dropull ku falë reagimit në kohë të Policisë është bërë e mundur që pas 45 minutash policia të kapë dhe arrestojë në flagrancë 28-vjeçarin rreth dy kilometra larg vendngjarjes.
Materialet i kaluan Prokurorisë së Rrethit Gjyqësor Gjirokastër për veprën penale “Vjedhje me dhunë e mbetur në tentativë”.
