Tjetër rrjedhje në kampin opozitar. Aleati i Partisë Demokratike, kryetari i Partisë Demokracia e Re Europiane, Koçi Tahiri, ka dorëzuar në KQZ formularin e dekriminalizimit duke i hapur rrugë pranimit të mandatit të deputetit.
Koçi Tahiri, në zgjedhjet e fundit plenare, ishte në listat e Partisë Demokratike në Qarkun e Korçës. Kreu i PDRE, ishte kandidat me numrin 14 në Korçë, ndërkohë nga djegia e mandateve Koçi Tahirit do t’i mundësohet që të hyjë në Parlament si pjesë e “opozitës së re”. Ish-aleati i PD-së, është me arsim të lartë dhe me profesion Agronom. Ai është 70 vjeç dhe për herë të parë pritet të futet në Parlament.
Nismës së opozitës së bashkuar për të qenë jashtë parlamentit, që e quajnë të kriminalizuar, nuk i janë bindur disa deputetë apo kandidatë për deputetët në zgjedhjet e fundit parlamentare. Disa syresh, si Rudina Hajdari, Lefter Koka apo Myslym Murrizi, nuk dorëzuan mandatin e deputetit. Ndërsa të tjerë pranuan të zinin venet vakante në parlament, pas dorëzimit të mandateve nga deputetë të opozitës. Dy grupimet krijuan kështu të ashtuquajturën “opozita e re”.
Deri më tani, parlamenti numëron 108 ligjvënës. /bn/
