Interes i madh nga tifozët për takimin e parë mes Kukësit dhe Skënderbeut, teksa tribuna përkarshi e stadiumit të Kamzës ishte me hyrje të lirë, ndërsa sektorët e tjerë me bileta.
Shumë lojtarë dhe ish-lojtarë të të dyja skuadrave panë ndeshjen nga tribuna VIP për arsye të ndryshme. Bëhet fjalë për ish-sulmuesin kroat, Pero Pejiç, kosovarin e Skënderbeut, Bajram Jashanica, i cili është dënuar nga UEFA, si dhe mbrojtësin e Kukësit, Gëzim Krasniqi, i cili ishte me paterica në tribunë për shkak të operacionit në gju.
Pejiç, i cili ka fituar titullin me të dyja ekipet, u shoqërua në tribunë nga kapiteni i Kukësit, Ylli Shameti, i cili ende nuk është gati pas dëmtimit. Më poshtë, pikantet e ndeshjes së djeshme.
* Katër ish-lojtarë të Luftëtarit ishin dje protagonistë absolutë të takimit, pikërisht Rexhinaldo, Shkurtaj dhe Rroca për Kukësin, si dhe Bregu për Skënderbeun. Para se ekipet të nisnin nxehjen, ata u takuan dhe qëndruan për disa minuta në fushë, duke bërë batuta.
* Presidentët Gjici dhe Takaj kanë preferuar ta ndjekin ndeshjen së bashku. Nuk kanë munguar ngacmimet mes tyre para dhe pas ndeshjes.
* Arbitrat nuk dolën në kohë në fushë në nisjen e pjesës së dytë, ndërsa më pas u mësua se vonesa erdhi për shkak të uniformës së portierit të Skënderbeut. Diçka e çuditshme, pasi kjo mund të kapej në kohë nga arbitrat. Loja rinisi me 4 minuta me vonesë.
* Vangjeli i hakërrehet arbitrit kryesor në një rast faulli të shkaktuar në gjysmëfushën e Kukësit në pjesën e dytë. Në këtë moment tifozët shajnë në kor mbrojtësin dhe kërkojnë karton të kuq, ndërsa Hamiti e ndëshkon me të verdhë. Mbrojtësit nuk i del inati as me anësorin, pasi kërkonte prej tij që të shikonte rastin.
* Rikthim në “vendin e krimit” për Eldorian Hamitin dhe Denis Rexhën. Më 3 mars kryesori që mban stemën e FIFA-s u dhunua në fund të ndeshjes Kamza-Laçi, ndërsa përpara tij, në të njëjtin stadium në muajin janar, u godit me boçe pishe në kokë anësori Rexha.
* Kur trajneri Gjoka së bashku me lojtarët shkuan te tifozët e shumtë kuksianë për t’i përshëndetur, entuaziazmi i madh bëri që një pjesë e mirë e tyre të shpërthenin rrjetat dhe të futeshin në fushë. Në atë moment ndërhynë stjuartët dhe bën të mundur largimin e tifozëve.
