Emisioni “BOOM” në RTV Ora solli sërish në vëmendje rastin e denoncuar në mars të këtij viti, të një zotërie nga Durrësi që nuk po merrte dot mbrapsht 60 milion lekë të vjetra që ja kishte dhënë borxh një zotërie 6 vjet më parë.
Për këtë ai ka fituar dhe procesin gjyqësor dhe ka një urdhër ekzekutimi.
Por halli i tij duket se nuk po merr zgjidhje, ku shpresën e vetme e kishte që ti bllokonte legalizimin e banesës 3 katëshe borxhliut te ALUIZNI.
Megjithatë debitori ka ndryshuar deklarimin duke kërkuar legalizimin të vetëm një barake me llamarinë dhe kabinës elektrike.
Denoncuesi: Pasi erdhën herën e parë dhe biseduam me juristin e ALUIZNI-t na u premtua të shkojmë të bëjmë matjet, kam kërkuar të bëhen matjet e shtëpisë. Kur shkuan nuk kishin matur shtëpinë tre katëshe, por llamarinën. Nuk ka pasur për objekt legalizimi banesën 3 katëshe. Pra mali na u mbars dhe na polli një mi. Është dërguar nga zyra përmbarimore urdhri ekzekutiv për sekuestro. Ka ndodhur tjetërsimi i objektit nga objekt banesë në një llamarinë privatizim.Më e bukura është se ka thënë kam për të legalizuar hyrjen e shtëpisë me llamarinë sipër dhe kabinën elektrike.Është skandal. Dosjen e kam parë me sytë e mi.Brenda ishte aplikimi për banesë, tani thuhet që nuk është.Nuk e di çfarë është bërë. Ishin certifikatat, fotografitë e shtëpisë tre katëshe, edhe specialisti thotë se ky më ka ardhur për banesë.I bëj thirrje drejtorit të ALUIZINI-t Artan Lame që ta kontrollojë me hollësi këtë shmangie, mbi dosje ka një urdhër ezekutiv, vendim gjykate. Pasi Drejtoria të japë verdiktin e vet, unë do ti drejtohem prokurorisë së Krimeve të Rënda për këtë abuzim.
Në një ballafaqim me juristin e ALUIZNI-t, ky i fundit i thotë denoncuesit: “Çfarë duhet të bëjmë ne me maskarain?Ai nuk thotë kam këtë shtëpinë por thotë kam këtë baraken, ne nuk e detyrojmë dot, çfarë ti themi ne atij? Përveçse ky më mashtron mua, mashtron shtetin, meqenëse është e paligjshme ka një institucion që banesat e paligjshme ti prishë, atij drejtohu, INUK-ut”.
BOOM i dërgoi edhe një kërkesë Agjencisë Shtetërore të Kadastrës në mënyrë që kjo të bënte verifikimet dhe auditimet në lidhje me këto pretendime.
