Katër persona janë vrarë gjatë një sulmi të organizuar ndaj një stacioni policor në pjesën qendrore të Arabisë Saudite.
Katër personat e vrarë besohet se ishin pjesë e grupit të armatosur që e kryen sulmin në stacionin policor të Zulfit, i cili është një qytet i vogël që shtrihet rrëth 250 kilometra në veriperëndim të Riadit.
Në pamjet e publikuara në mediet lokale shihej një veturë me dyer të hapura pranë stacionit policor dhe dy trupa të përgjakur të njerëzve në tokë. Në vendin e ngjarjes janë dëgjuar edhe të shtëna me armë zjarri.
Gazeta “Al Arabia” njoftoi se sulmuesit ishin të armatosur me mitraloza, bomba dhe koktej molotovi.
Militantët i kanë sulmuar organet e sigurisë në Arabi Saudite për vite të tëra pasi ky shtet e kishte shtypur një kryengritje të Al Qaedas më shumë se një dekadë më parë.
Vitin e kaluar, një pjesëtar i forcave të sigurisë dhe një shtetas i Bangladeshit ishin vrarë gjatë një sulmi ndaj një pike kontrolli të forcave të sigurisë, shkruan “Reuters”.
