Vincent (Dominic) De Caro, 29 vjeç, lindur në New York dhe Arbër Isaku, 29 vjeç, lindur në New York, por me origjinë shqiptare, u ekstraduan drejt SHBA-ve. Lajmin e konfirmuan këtë të shtunë burime zyrtare nga Policia.
Lexo edhe: VIDEO/ Laborator për drogë sintetike, çfarë iu gjet 2 amerikanëve
“Në kuadër të bashkëpunimit me Shërbimin Diplomatik të Sigurisë dhe Hetimit pranë Ambasadës së Shteteve të Bashkuara të Amerikës në Tiranë dhe Interpol Washingtonin/SHBA, u bë ekstradimi nga Shqipëria drejt Shteteve të Bashkuara të Amerikës i shtetasve të shpallur në kërkim ndërkombëtar dhe të arrestuar në Shqipëri, konkretisht. Shtetasit e mësipërm ishin shpallur në kërkim ndërkombëtar nga Interpol Washingtoni/SHBA, pasi Gjykata e Connecticut/SH.B.A. në vitin 2018 ka vendosur masën e sigurisë ‘Arrest me burg’ për veprat penale ‘Prodhim dhe shitje të lëndëve narkotike dhe substancave psikotrope’ parashikuar nga Kodi Penal i Sh.B.A-së. Arrestimi provizor i shtetasve të mësipërm me qëllim ekstradimi drejt Shteteve të Bashkuara të Amerikës, është bërë në datën 21.09.2018 gjatë një operacioni të përbashkët mes Policisë së Shtetit dhe Shërbimin Diplomatik të Sigurisë dhe Hetimit pranë Ambasadës së Shteteve të Bashkura të Amerikës në Tiranë dhe Interpol Washingtonin/SHBA. Shtetasit e mësipërm ju dorëzuan Oficerëve të Policisë së Shteteve të Bashkuara të Amerikës në Aeroportin e Rinasit”, njoftoi Policia.
Laboratori i drogës
Të dy u vunë në pranga vitin e kaluar gjatë operacionit të koduar sintetiku. DeCaro dhe Isaku u vunë në pranga më 21 shtator, teksa tentonin të largoheshin drejt Kosovës nga pika e kalimit kufitarë Morinë.
Ata kishin krijuar në një kompleks pranë rrugës së Kavajës në Tiranë, një laborator të dograve sintetike. /BN/
