Edhe pse Gjermania e tij nuk ka shkëlqyer në ndeshjen e dytë të Europianit të futbollit, trajneri i kombëtares Joachim Loew mendon që tani për fazën me eliminim direkt. Madje ai parashikon një përballje me Italinë në çerekfinale, ku kërkon një hakmarrje për Botërorin e vitit 2006. “Atë vit Italia e nisi jo mirë turneun, por u ngrit pas fazës në grupe dhe në fund fituan kupën. Këtë vit e kanë nisur ndryshe, duke fituar ndeshjet e para dhe kjo më bën të mendoj se do të jetë më mirë për ne. Nëse përballemi në çerekfinale me Italinë, do ta mundim”, shprehet Loew.
Kombëtarja gjermane nuk ka bindur ende me lojën e saj, teksa ende nuk është efikase në sulm. “Para një jave të gjithë kritikonin mbrojtjen, tani kritikohet sulmi. Problemi është se ndaj Polonisë (barazim 0-0) nuk kishim asnjëherë shumë lojtarë në zonën kundërshtare për të bërë golin e fitores. Kishte kohë që nuk kishim probleme në sulm, por mendoj se gjërat do të zgjidhen shpejt”, thotë Loew, që nuk është dakord kur e kritikojnë se mungon lojtari-lider. “Kjo gjë ndodhi edhe para Kupës së Botës, por në fund fituam. Schweinsteiger, Neuer, Hummels u bënë lider dhe janë të tillë edhe sot. Unë besoj se do të ecim shumë në këtë turne”, tha trajneri gjerman.
