Grabitja me armë në një supermarket që ndodhi mbrëmjen e djeshme në Kamëz ku dy persona të armatosur dhe të maskuar tentuan të grabisnin një supermarket, sipas dëshmitarëve në ngjarje makina ku u largua autori me kallash në dorë ishte me flamurin shqiptar sipër.
Gjatë grabitjes, autorët hasën rezistencën e punonjësve të biznesit. Kështu ata plagosën shitësen me armë zjarri.
Një dëshmitar që ndodhej në lokalin përballë vendngjarjes tregon se autorët kanë përdorur për ngjarjen një makinë të mbuluar me flamurin shqiptar.
Rrugët kanë qenë të boshatisura nga kalimtarët, pasi shumica e tyre kanë qenë të ulur nëpër lokale duke parë ndeshjen e “Euro 2016”, Gjermani¬ -Poloni. Ndërsa supermarketi që ata kishin si synim të grabisnin ishte drejt mbylljes dhe ky ishte qëllimi, që të vidhnin paratë e xhiros që do të transportoheshin nga policia private.
“Isha me disa miq duke parë ndeshjen në lokalin përballë supermarketit. Dëgjuam të shtënat me armë dhe ato na tërhoqën vëmendjen. Kur u kthyem të shihnim se çfarë kishte ndodhur, pamë një djalë që po dilte me një kallash në dorë. Ai hipi në një makinë që ishte parkuar para supermarketit. Ishte një makinë e zezë e mbuluar me flamurin tonë. Iku me shpejtësi, por targën nuk ia pamë dot, sepse ia mbulonte flamuri. Më pas, morëm vesh që ishte plagosur edhe një vajzë aty, më duket se ishte shitësja”, tregon një nga dëshmitarët e ngjarjes.
Burime nga Policia e Tiranës thanë se ngjarja ka ndodhur rreth orës 21:55, në “Bulevardin Blu” të Kamzës, në momentin që po mbyllej supermarketi. Një automjet ka parkuar derës kryesore dhe nga sedilja e pasagjerit ka zbritur autori i ngjarjes, i cili është futur brenda. Në atë moment ndodheshin punonjësit dhe dy klientë, që fatmirësisht u kanë shpëtuar plumbave. Pas të shtënave, autori ka dalë me nxitim duke u larguar me makinën që e priste jashtë, në timonin e të cilës ishte një tjetër person.
