Vetëm 4 ose 5 ditë na ndajnë nga gjyqi i madh në KAS. Enigmat duket se po marrin fund, të paktën referuar edhe vetë letrës që botoi Skënderbeu për datën kur do të zhvillohet gjyqi kundër UEFA-s.
Dokumenti tregon se seancat në Lozanë do të jenë më 16 dhe 17 prill. Gjykata e Arbitrazhit Sportiv pritet të vendosë lidhur me dënimin e UEFA-s, që e përjashtoi klubin korçar për 10 vjet nga Kupat e Europës, si dhe e gjobiti me 1 milion euro. Skënderbeu u akuzua se trukoi ndeshje në raundet eliminatore në Ligën e Kampionëve, si dhe në fazën e grupeve të Ligës së Europës. Edhe pse deri më tani vetë KAS nuk e ka zbardhur datën e gjyqit, ka qenë vetë klubi që ka dhënë lajmin. Madje, në Korçë janë optimistë se do të fitojnë pafajësinë e plotë, duke hedhur poshtë vendimin e marrë nga UEFA.
/Panorama Sport
