Pesë persona janë arrestuar nga Policia e Tiranës, pasi dyshohet se shpërndanin kokainë në kryeqytet. Mësohet se është arrestuar Klajdi Gjeci, që njihet si kreu i grupit të kokainës dhe si miku i Emiljano Shullazit.
Klajdi Gjeci njihet si nje person me precedentë penale nga policia. Ai rezulton të jetë edhe mik i Emiljano Shullazit dhe figuron i pranishëm ne disa ngjarje kriminale në kryeqytet. Në vitin 2012 Gjeçi është proceduar për armëmbajtje pa leje, ndërsa në vitin 2015 për plagosje të lehtë me dashje. Në të dyja këto raste 31-vjeçari është lënë i lirë nga gjykata, pasi çështjet ndaj tij janë pushuar. Klajdi Gjeçi, në dhjetor të 2015, është marrë peng nga tre persona në afërsi të Farmacisë 10 në kryeqytet.
Për herë të fundit, 31-vjeçari Klajdi Gjeçi, u arrestua në Janar 2018, i dyshuar ai autor i vendosjes së një sasie tritoli në makinën e një biznesmeni në zonën e Liqenit të Thatë, ngjarje e ndodhur në nëntor 2017. Por, Gjeçi u lirua sërish nga gjykata.
