Ishte apo jo cënim i sigurisë kombëtare grabitja në Rinas? Nga opozita janë shprehur zë plote se “po”, ndërsa nga qeveria qëndrimet janë të dyzuara.
Ministrja e Mbrojtjes Olta Xhaçka, e cila një ditë më parë dha edhe urdhrin që forca ushtarake të ruajnë sigurinë në aeroport, ka artikuluar se nuk ka cënim të sigurisë kombëtare. Ndërsa nga Ministria e Brendshme është thënë se siguria kombëtare është cënuar.
“Nuk kemi asnjë ndryshim të shkallës së sigurisë, as ngritje të alarmit, as luftë, as cënim sigurie kombëtare. Kemi thjesht një cënim sigurie, siç kemi pasur edhe në bazën e Pashalimanit, më herët, dhe siç bëmë atëherë duke përforcuar masat e sigurisë, ashtu bëmë edhe këtë herë”, tha Olta Xhaçka në një lidhje të drejtpërdrejtë me emisionin “Open”.
Më herët në të njëjtin televizion, zv/ministri i Brendshëm Besfort Lamallari, tha se grabitja e bujshme në Rinas është “cënim i sigurisë kombëtare”.
“U cënua siguria kombëtare, u cënua siguria në një nyje nevralgjike të vendit tonë, siç është aeroporti i vetëm ndërkombëtar në Shqipëri. Duhet të kuptojmë pse ndodhi kjo”, deklaroi Lamallari. /Boldenws.al/
