Nga Boldnews.al
Një rast i semundjes infektive të meningjitit është zbuluar në Fier, ndërsa rasti po mbahet i fshehtë nga Ministria e Shëndetësisë.
Boldnews.al ka siguruar të dhëna se një pacient i moshës 46 vjeç është diagnostikuar me sëmendjen e suspekt meningokoksemi, apo siç njihet ndryshe meningokoku. Sëmundja është ngjitëse dhe konsiderohet vdekjeprurëse nëse ajo nuk diagnostikohet në kohë nga mjeku.
Pacienti në fjalë është diagnostikuar në Fier, ndërsa është transportuar drejt pavionit infektiv në QSUT.
Referuar të dhënave, pacienti ka shfaqur një gjendje të rënduar shëndetësore, temperaturë 41oC, të vjella me ngjyrë kafe te errët, njolla të errëta në lëkurë. Po kështu ai ka pasur një ndërgjegje jo të qartë. Të gjitha këto janë karakteristikat e sëmundjes infektive, që prek çdo grupmoshë.
Boldnews.al ka kontaktuar me mjekë që sqarojnë se meningokoku është sëmundje ngjitëse e cila karakterizohet me ndezjen e cipave që mbështjellin trurin.
Shkaktarët e meningjitit mund të jenë viruset dhe bakteret. Periudha nga infeksioni e deri tek shenjat e sëmundjes mund të jetë nga 2-10 ditë dhe ajo varet nga shkaktari i sëmundjes.
Të gjitha moshat dhe të dy gjinitë mund të preken nga meningokoku, por më e shpeshtë është tek fëmijët dhe të rinjtë. Rrugët e përhapjes gjenden te uji, ushqimi, kontakti i drejtpërdrejtë me të sëmurin, insektet, ajri.
Nuk dihet nëse ky është një rast i izoluar, apo ka raste të tjera, ndërsa Ministria e Shëndetësisë nuk ka dhënë informacione.
Boldnews.al ka kontaktuar me zyrtarë të Ministrisë së Shëndetësisë që nuk kanë dhënë informacione, ndërkohë që burime nga pavioni infektiv në Tiranë konfirmojnë shtrimin e pacientit në QSUT dhe mbajtjen e tij nën kujdes mjekësor të veçuar. Në 2018, ka pasur një rast të kësaj sëmundjeje agresive që i mori jetën një vajze 18 vjeçare, ndërkohë që mjekët pohojnë se janë sëmundje të rralla që nuk i japing kohë bluzave të bardha për të reaguar.
Gjithsesi fakti që janë sëmundje infektive dhe me rrezikshmëri të lartë, në rastin më minimal nga strukturat e shëndetësisë duhet të ketë një apelim për qytetarët, masat që duhet të kenë parasysh për t’u mbrojtur.
