Ngjarja e një dite më parë në Rinas, ku u vodhën 10 milionë euro, tregoi edhe njëherë paaftësinë e Policisë së Shtetit, e cila tashmë nuk është më në gjendje të godasë apo luftojë krimin e organizuar në vend.
Jo vetëm qytetarët shqiptarë që përballen çdo ditë me fenomene kriminale në vend, por edhe mediat ndërkombëtare raportonin se Shqipëria është kthyer në një vend të pasigurtë.
Sa i përket grabitjes së djeshme, Ministri i Brendshëm Sandër Lleshaj, nxitoi të akuzojë konçensionarin kinez, duke e akuzuar atë si fajtor të vjedhjes së 10 milionë eurove.
Por pasi Lleshaj është bërë totalisht i pabesueshëm dhe më shumë shihet si manekin se si një zyrtar i qeverisë, kryeministri Edi Rama përdori planin B, duke nxjerrë para mediave ministren e Mbrojtjes Olta Xhaçka.
Edhe Xhaçka ashtu si kolegu i saj Lleshaj, e drejtoi menjëherë gishtin e akuzës nga kompania konçensionare, por indirekt targetoi edhe Policinë e Shtetit, kur deklaroi se nga sot me ruajtjen e aeroportit të do të merret Policia Ushtarake dhe Forcat Speciale të Ushtrisë.
Pyetja që lind është se përse duhet përdorur ushtria kur vetë kryeministri Edi Rama dhe miqtë e tij (që paguhen nga tepsia e madhe shqiptare) deklarojnë se vendi ecën i sigurtë drejt BE-së, kemi bërë përparime, madje shqiptarëve ju refuzohet azili nëpër botë, se vendi ynë futet tek vendet e sigurta?
Por përgjigjen e kësaj pyetjeje e dha vetë Xhaçka sot. Pra Shqipëria është vend i pasigurtë, dhe policia nuk është më në gjendje që të luftojë krimin e organizuar, pasi tashmë ai ka kapur nivelet më të larta shtetërore.
Pra shkurtimisht edhe nëse konçensionari ka gabuar apo ka dështuar keq në ruajtjen e aeroportit për të cilin merr para nga taksat e shqiptarëve, sërish nuk duhej përdorur ushtria, por duhet të ishte Policia e shtetit ajo që duhej të merrte në mbrojtje aeroportin.
Arsyeja se përse nuk ndodh kështu në Shqipëri, është se në vendin tonë, policia përdoret për të rrahur, dhunuar dhe grabitur qytetarët si dhe të marrë urdhra nga kriminelët, prandaj ushtria duhet që të luftojë grabitësit, gjithmonë nëse këta të fundit nuk punojnë për shtetin. /Boldnews.
