Presidenti i republikës Ilir Meta i bëri thirrje Prokurorisë së Përgjithshme që të nisë menjëherë hetimet ndaj të gjitha institucioneve ligjzbatuese, dhe të çojë para drejtësisë të gjithë personat të cilët me papërgjegjshmërinë e tyre u bënë shkaktarë të grabitjes së djeshme në Rinas.
Meta tha para mediave se vitin e shkuar në Mbledhjen e Këshillit të Sigurisë, të gjitha palët e pranishme në tryezë kishin rënë dakord për forcimin e sigurisë në vend dhe ato autoportuale, pasi ishin cënuar disa herë nga krimi.
Por sipas Presidentit ngjarje e djeshme tregoi edhe njëherë mungesën dhe seriozitetin e disa institucioneve dhe personave të cilat vunë edhe njëherë në rrezik rendin dhe sigurinë në vend.
‘Bazuar në raportet të mbërritura nga institucionet përgjegjëse, kam ngritur mungesën e përgjegjësive të qartë në aeroportin Nën Tereza. Dhe e dyta mungesën e ndërhyrjes së Policisë së shtetit.
E konsideroj ngjarjen e grabitjes së djeshme, si cënim serioz të sigurisë kombëtare, rendit publik dhe imazhit të vendit tonë. Ndaj i bëj thirrje të gjitha institucioneve ligjzbatuese identifikimin dhe arrestimin e grabitësve si dhe gjendjen e parave.
Prokuroria të hetojë jo vetëm grabitjen e djeshme, por edhe institucionet dhe individët e papërgjegjshëm që nuk kanë kryer detyrën. Presidenca vendos në dispozicion të prokurorisë të gjithë domentacionin e mbledhjes së këshillit të Sigurisë të bërë në 16 maj të vitit 2018-të’, deklaroi Meta.
