Skënderbeu ka hyrë në fazën më të nxe htë të sezonit dhe Orges Shehi e ka të qartë se këto 9 ndeshje do të vendosin shumë. Në intervistën e dhënë për “Panorama Sport”, trajneri thekson se hapat fals janë të ndaluar, ndaj edhe kërkon që kthesa e madhe të vijë duke filluar nga Partizani.
Nuk ngurroi që të komentonte edhe dyshimet e ngritura publikisht prej trajnerit të Kastriotit për ndeshjen Luftëtari-Skënderbeu. Durrsaku e ka cilësuar deklaratën e dhënë prej Bledar Devollit jo vetëm të pavend, por mbi të gjitha të pamenduar.
Pjesë nga Intervista
Kjo javë pushim sa e domosdoshme ka qenë për Skënderbeun?
Nuk mund ta quajmë një javë pushimi, pasi ishin në total 10 ditë në dispozicion për të përgatitur ndeshjen me Partizanin. Mund të them se ishin ditë që na kanë shërbyer për të analizuar me kujdes gabimet e shumta që kemi bërë kohët e fundit dhe për të nxjerrë mësime se çfarë duhet të bëjmë në vijim deri në fund të sezonit.
Luani me Partizanin. Është momenti i duhur për t’u përballur me kundërshtarin, pasi vini nga humbja në Gjirokastër?
Ne duhet të lëmë pas atë ndeshje që kemi bërë ndaj Luftëtarit dhe të harrojmë humbjen. Duhet të tregojmë se jemi të denjë për të qenë pjesë e Skënderbeut dhe kjo bëhet vetëm në fushë. Ajo që mua më shqetëson është luhatja që ka ekipi, pasi bëjmë mirë me rivalët dhe gabojmë në ndeshje të tjera. Ky është mentaliteti i gabuar që kemi këtë sezon.
Si e komentoni deklaratën e Devollit në lidhje me ndeshjen në Gjirokastër…
Mund të them se ishte deklarata më e pavend dhe më e pamenduar mirë. Do të ketë qenë një deklaratë emocionale ajo, se ndryshe nuk e shpjegoj dot… Gjithsesi, unë jam Orges Shehi dhe nuk jam marrë asnjëherë as me kundërshtarët, as me rivalët, as me kolegët. Kështu që nuk dua të komentoj më shumë se kaq. Thjesht ka qenë një deklaratë e pamenduar mirë.
