Nga Boldnews.al
Ndërsa në Parlament aktualisht ka shkuar 101 numri i deputetëve, pas djegies së mandateve të opozitës, Rama ka paralajmëruar ndryshime të Kodit Penal, me të cilin kupton rritjen e dënimeve për akuzën e goditjes për shkak të detyrës.
Këtë do e bëjë me “opozitarët e rinj”, pasi për të kryer ndryshimet ligjore në Kod nevojitet shumicë e cilësuar, 84 vota. E vetme, PS ka 74 mandate, plus katër të tjerë që erdhën nga PDIU dhe deputeti Tom Doshi, por këto prurje të hershme nuk i kalojnë 78 vota, ndaj i nevojitet në domosdoshmëri kartonët jeshil të “opozitarëve” të rinj të cilët kanë dalë kundër vendimit politik dhe të joshuar nga postet, apo paraja janë bërë pjesë e Parlamentit.
Këtë kategori Rama po e përdor për të kryer ndryshime ligjore, të cilat kërkojnë shumicë të cilësuar votash. Një prej tyre janë amendimet e pritshme në Kodin Penal. “Do futen në burg edhe ata që bllokojnë rrugët edhe ata që godasin për shkak të detyrës, ndaç zyrtarë në bashki, ndaç në parlamente, të gjitha këto do ti adresojmë”, theksoi Rama në një takim në Librazhd.
Në këtë formë, po instalon më shumë frikën dhe minidiktaturën. Të parët që do e pësojnë janë protestuesit. Dy protesta që po zhvillohen në vijimësi janë ato të opozitës dhe të banorëve të Unazës së Re. Edhe deklarata e sotme ishte specifikisht për ta. Banorët e Unazës së Re kanë më shumë se pesë muaj që protestojnë çdo ditë kundër projektit për ndërtimin e Unazës së Re, pasi u prek shtëpitë ku banojnë prej tre dekadash.
Shpesh ka pasur konfrontime të tyre me policinë, kanë kaluar secili nga qelitë e burgut, por revolta nuk është zbehur, përkundrazi ka marrë një hov edhe më të madh. Gjithashtu protestat e opozitës para Parlamentit janë një tjetër “imazh” që kryeministri kërkon ta zbehë dhe për tia arritur qëllimit do ashpërsojë nenet pekatëse në Kodin Penal të “Goditjes për shkak të detyrës”.
Mjafton vetëm një incident, ku një punonjës policie të shtyhet apo goditet me një bidon ujë dhe më pas protestuesit ti presë dënimi i rëndë. Rama ka nisur të qeverisë nëpërmjet terrorit, e tashmë do përdorë deputetët e rinj për ta mundësuar edhe ligjërisht. Me një polici dhe prokurori totalisht nën kontrollin qeveritar dhe shpërsimet në Kodin Penal janë shenjat e dukshme se reprezalja sapo ka nisur. Është koha për të hapur burgje të reja…
