Dy të rinj nga Vlora janë vënë në pranga nga policia e Lezhës, për trafik droge dhe lëndësh plasëse, ndërsa një i tretë është shpallur në kërkim. Armand Lukani 23 vjeç dhe Amelda Elezi 21 vjeçe, janë vënë në pranga, në kuadër të operacioni “The long way”, i ndjekur me metoda prooaktive.
Ndërsa në kërkim u shpall E.E., 27 vjeç, banues në Vlorë (i dënuar më parë).
Operacioni nga Sektori për hetimin e krimeve në Drejtorinë Vendore të Policisë Lezhë në bashkëpunim me Prokurorinë e rrethit, çoi në sekuestrimin e 3 minave të montuara me telekomandë të shpërthimit në distancë, 2.3 kg lëndë narkotike e dyshuar marijuanë si dhe 1 telefon celular.
Shtetasit e mësipërm u arrestuan në flagrancë në qytetin e Lezhës, pasi nga kontrolli në çantat e tyre u gjetën të fshehura 3 mina me shpërthim të telekomanduar nëpërmjet celularit, si dhe një sasi prej 2.3 kg lënde narkotike e dyshuar marijuanë, njoftoi Policia.
Materialet procedurale në ngarkim të tyre u referuan në Prokurorinë pranë Gjykatës Shkallës së Parë Lezhë për veprime të mëtejshme, për veprat penale “Trafikimi i lëndëve plasëse” dhe “Prodhimi dhe shitja e lëndëve narkotike” parashikuar nga nenet 282/a/2 dhe 283/2 të Kodit Penal, shtuan të njëjtat burime. /BN/
