Drejtësia shqiptare e ka të pamundur që të mbajë pas hekurave bosët e krimit të organizuar. Pas Domart Konjarit, apo edhe të disa eksponentëve të krimit në Fier, gjykatat shqiptarë kanë dhënë një tjetër vendim të dyshimtë.
Disa ditë më parë, Gjykata e Tiranës ka rrëzuar prokurorinë dhe drejtësinë italiane që kërkonte dënimin e Blenard Fejzullas me 15 vite burg. Më 10 qershor, ditë kur filloi edhe kampionati evropian i futbollit, gjykata vendosi të lirojë nga qelia mikun e Arjan Selimit, i ekzekutuar disa vite më parë. Seilimi dhe Fejzulla ishin pjesë e të ashtuquajturës banda “Kompas”.
Sipas informacioneve që disponon Boldnews.al, gjykata ka vendosur “rrëzimin e kërkesës së Prokurorisë së Tiranës. Mosnjohjen e efekteve juridike në shtetin shqiptar të vendimit penal të huaj Nr.2003NC/2003 – Reg. Gen.n 10196/2002-R.G.N.R.N. 48538/2000, datë 26/05/2003 të Gjykatës së Milanos të Shtetit të Italisë të dhënë ndaj shtetasit shqiptar Blenard Fejzulla, alias Ermal Mali, për shkak se për të njëjtin fakt dhe ndaj të njëjtit person në shtetin Shqiptar është dhënë një vendim penal i formës së prerë”.
Në muajin mars të këtij viti, Blenard Fejzulla u arrestua nga Policia e Tiranës. Ai ishte një i dënuar me 6 vjet burg për akuzën e trafikut të drogës. Në Itali rezultonte i dënuar me 15 vjet heqje lirie për trafik droge dhe pjesëmarrje në organizatë kriminale.
Fejzulla, njihet si një nga anëtarët e grupit “Kompas” që drejtohej nga Armand Andoni allias Arjan Selimi. Selimi është ekzekutuar me disa plumba poshtë pallatit të tij, ndërkohë që për ish-mikun e tij Blenard Fejzulla Italia ka nisur prej disa kohësh gjuetinë. Fejzulla është arrestuar nga autoritet shqiptare me qëllim ekstradimin e tij në Itali. 39 vjeçari ishte në kërkim pasi Gjykata e Milanos e kishte dënuar atë me 15 vite burg, nën akuzën e pjesëmarrjes në organizatë kriminale me qëllim trafikut të drogës.
Ndërkohë në Shqipëri Fejzulla është dënuar me 6 vite burg nga Gjykata e Krimeve të rënda, dënim ky të cilin ai e ka shlyer, ndërsa drejtësia shqiptare vendosi se Fejzulla e ka kryer dënimin.
