Humbja në Gjirokastër ka sjellë zhgënjim në Korçë. Luhatjet e vazhdueshme kanë lodhur edhe presidentin. Ardjan Takajt duket se i është sosur durimi, aq sa në një interviste të dhënë për “Panorama Sport” nuk ngurron që të shfryjë ndaj lojtarëve. Paralajmëron se në verë do të ketë revolucion në ekip, ndërsa e pranon që kanë gabuar në merkato.
Ai thekson se disa lojtarët nuk e meritojnë ta veshin fanellën e skuadrës që në dekadën e fundit ka bërë histori, pasi thjesht po e shëtisin në fushë atë. Nuk kishte si të mos përgjigjej edhe për rastin e shumëpërfolur të Marko Radasit, ndërsa thekson se lojtari është në Kroaci për çështje e veta, por jo për rrogat.
Pjesë nga intervista
Kur pritej vazhdimësia, Skënderbeu humb sërish. Çfarë po ndodh?
Duhet të kishim treguar më shumë, por në kushtet kur në ekip ka lojtarë që nuk e meritojnë të jenë pjesë e Skënderbeut, nuk mund të thuash asgjë më shumë dhe të pretendosh më tepër. Është një gabim i bërë që në ndërtimin e skuadrës në merkato. Dhe duhet ta pranojmë, kemi gabuar pikërisht këtu.
Çfarë doni të thoni me këtë?
Dua të them se në fund të sezonit do të ketë revolucion në ekip. Nuk mund të qëndrojnë te Skënderbeu lojtarë që nuk kanë idenë se për çfarë fanelle po luajnë. Lojtarë që nuk e meritojnë të jenë pjesë e Skënderbeut.
Çfarë po ndodh me Radasin. Si qëndron e vërteta e kapitenit?
Te Skënderbeu, që të jeni të gjithë të qetë, nuk ka çështje rrogash. Për këtë keni fjalën time. Radas ka qenë me ne, por për arsye familjare udhëtoi drejt Kroacisë para disa ditësh dhe do të kthehet. Për të gjitha këto klubi është në dijeni dhe gjithçka është bërë me lejen tonë. Nuk ka asnjë çështje dhe situata është krejt normale.
